Элбэх кыбартыыралаах дьиэлэр тиэргэннэрин ким хомуйуохтааҕый?

Куорат баһылыгын бастакы солбуйааччы Георгий Гаврильев баһылыктаах мунньах муус устар 28 күнүгэр «Элбэх кыбартыыралаах олорор дьиэлэр тиэргэннэрэ дьиэни бас билээччилэр уопсай баайдара-дуоллара буолбатах түгэнигэр, Салайар хампаанньа ону көрөрө-истэрэ, хомуйара сөп дуо?» диэн ыйытыы тула дьүүллэстэ.
Мунньахха Росреестр, «Роскадастр» ППК Саха Өрөспүүбүлүкэтигэр салааларын, Дьокуускай куорат прокуратуратын, Олохтоох дьаһалта салааларын, Салайар хампаанньалар, ТСЖлар бэрэстэбиитэллэрэ кыттыыны ыллылар.
Бэлиэтээн эттэххэ, элбэх кыбартыыралаах олорор дьиэлэр таһынаҕы территорияны сокуонунан оҥоруу Олохтоох дьаһалта болҕомтотугар турар. Бүгүҥҥү күҥҥэ маннык сир учаастактарын 61 бырыһыана сокуонунан докумуоннаммакка турар. Арассыыйа Үрдүкү суута быһаарарынан, сокуонунан оҥоһуллубатах учаастакка эппиэтинэһи дьиэни бас билээччилэр уонна Салайар хампаанньалар сүгэллэр. 
Дьокуускай куорат Олохтоох дьаһалтатын ОДьКХ уонна энергетикаҕа департаменын начаалынньыга Максим Шомоев бэлиэтээбитинэн, дьиэ тиэргэнин көрөр-истэр эбээһинэс дьиэни бас билээччилэргэ, Салайар хампаанньаҕа эбэтэр ТСЖ сүктэриллэр.
«РФ ОДь кодексатын 161 ыстатыйатын 2.3. чааһынан элбэх кыбартыыралаах олорор дьиэ Салайар хампаанньата дьиэни бас билээччилэр иннилэригэр тиэргэни көрөр эбээһинэстээх», - диир Максим Шомоев.
Мунньах кыттыылаахтарыгар холобур быһыытынан «Сфера комфорта» Салайар хампаанньа үлэтин билиһиннэрдилэр.  Ол курдук, Салайар хампаанньа дьиэни бас билээччилэри кытта төлөбүргэ хаары тиэйэргэ дуогабардаспыт. Маны сэргэ дьиэни бас билээччилэр уопсай баайдарын-дуолларын көрөр.
Маныаха анал тарыып олохтоно илик буоллаҕына, өҥө муниципальнай тэриллиинэн олохтоммут тарыыбынан оҥоһуллар. Оттон Олохтоох дьаһалта бу тарыыбы сыл аайы саҥардан иһэр, диэн иһитннэрэр Олохтоох дьаһалта пресс-сулууспата.