Экспедицияттан элбэҕи билэбит

Дьокуускай куорат 12-с №-дээх орто оскуолатын физика, математика хайысхалаах кылаастарын үөрэнээччилэрэ өрөспүүбүлүкэ кэрэхсэбиллээх сирдэринэн айанныыр үтүө үгэстээхтэр. Учууталлара Александр Константинович Чиряев салалтатынан Саха сирин туһунан элбэҕи билэн-көрөн, эт-хаан, өй-санаа өттүнэн сайдан кэлэллэр. Бүгүн кинилэр тэттик суруйууларын үөрэ-көтө бэчээттиибит.

Ыстаада олоҕуттан умнуллубат түгэннэр

Быйыл сайын экспедиция былаанынан Муома улууһугар тиийбиппит. Массыынанан куһаҕан суолга айанныыр сылаалаах этэ. Ол да буоллар, ыстаадаҕа тиийэн, табаһыттар олохторун көрөн, бу сырыыбытыттан олох кэмсиммэтэҕим. 

Хадаардаах диэн хайалар анныларыгар баар ыстаадаҕа уонча киһи тыһыынчаттан тахса табаны манаан олорор этэ. Бастакы тиийбит күммүтүгэр олохтоохтору кытта билсэн баран, табалары тутаттаан, маамыкта кэтэрдэн, муостарын эрбээн ыыппыппыт. Мин бу күн табаһыттар уустук олохторун кытта билсэн, бэйэбэр элбэх саҥаны арыйбытым. Үгүс улууска сырытыннаран, кинилэр уратыларын, олохторун-дьаһахтарын кытта билиһиннэрбит учууталым Александр Константинович Чиряевка махталым муҥура суох.

Гаврил Садовников, Дьокуускай куорат 12-с №-дээх оскуолатын 11 «Б» кылааһын үөрэнээччитэ.

Хайаҕа ыттыы – бэйэни кыайыы

Быйыл биһиги оскуолабыт 10 уонна 9 кылаастара сүүрбэччэ буолан икки учуутал салалтатынан Кэбээйи Сиэгэн Күөлүгэр айаҥҥа туруммуппут.

Хайаҕа диэри биир килэмиэтири халыҥ хаарынан сатыы хаампыппыт. Сарсыарда 9 чааска хайаҕа кэлэрбитигэр эмиэ да күннээх курдук эрээри, тыала тымныыта сүрдээх этэ. Мин, маннык айаҥҥа үөрүйэҕэ суох киһи, оҕолорбуттан хаалан хаалбытым. Соҕотох хаалан, сылайан-элэйэн, сынньана сытан, чуут утуйа сыспыт этим. «Утуйдахпына, тоҥон өлүөм, бачча кэлэн баран, тоҕо тахсыа суохтаахпыный?” дии санаан, туох баар күүспүн мунньунан, салгыы дабайбытым.

Бу Саха сиригэр биллэр Пик чекистов диэн хайа үрдүгэ 1800 миэтэрэ эбит. Үөһэ тахсан баран, аллараны көрөн, биһиги дойдубут хайдахтаах курдук кэрэтин, кыраһыабайын сөхпүтүм. Хайаттан  бары сырылаан түспүппүт. Онон бу үрдүк хайаны дабайыым миэхэ бэйэбин кыайыы курдук өрүү умнуллубат.

Арсен Коротких, Дьокуускай куорат 12-с №-дээх оскуолатын 11 «Б» кылааһын үөрэнээччитэ.