Егор Кардашевскай ыксаллаах быһыыны-майгыны сэрэтэр мунньаҕы ыытта

Мунньахха салалта территориальнай уорганнарын, ресурсанан хааччыйар, муниципальнай тэрилтэлэр, салайар хампаанньалар бэрэстэбиитэллэрэ кытыннылар. 

Санатар буоллахха, күүһүрдүллүбүт эриэйдэлэри ыытарга оҕо өлүүлээх быһылаан кэнниттэн, куорат баһылыгын эбээһинэһин толорооччу Георгий Гаврильев сорудахтаабыта. Эриэйдэлэри салалта территориальнай уорганнарын кытта Куораты тутуу уонна тырааныспар инфраструктуратын департаменын үлэһиттэрэ,  Госстройжилнадзор управлениетын исписэлиистэрэ ыыталлар. Бу иннинэ Куораты тутуу уонна тырааныспар инфраструктуратын департаменын начаалынньыга Иван Гуляев иһитиннэрбитинэн, билиҥҥи туругунан сэрэхтээх конструкция булуллубатаҕа.

Мунньах чэрчитинэн территориальнай уорганнар салайааччылара Егор Кардашевскайга туох үлэ ыытыллыбытын, бэйэлэрин учаастактарыгар баар көрүүтэ-истиитэ суох уонна сэрэхтээх конструкциялар, эбийиэктэр туруктарын туһунан иһитиннэрдилэр.

«Инники өттүгэр күүспүтүн түмэн итинник ыксаллаах быһыыны-майгыны таһаарыа суохтаахпыт. Саамай сүрүнэ – куорат олохтоохторугар куттал суоһуо суохтаах!», - диэн бэлиэтээтэ Егор Кардашевскай.

Салайар хампаанньалар бэрэстэбиитэллэрэ этэллэринэн, ресурсанан хааччыйар уонна бэдэрээтчит тэрилтэлэр сороҕор араас үлэни ыытар территорияларын күрүөлээбэттэр. Итини таһынан, салайар хампаанньалары уонна олохтоохтору булгуччу үлэ ыытылларын туһунан эрдэттэн сэрэтиэхтээхтэр диэн тоһоҕолоон бэлиэтэннэ.

«Куораппытыгар наһаа элбэх сир үлэтэ ыытыллар, үксүгэр дэҥтэн сэрэнии тиэхиньикэтин тутуспаттар. Бэдэрээтчит тэрилтэлэри кытта өссө төгүл куттал суох буоларын курдук инструктаһы  ыытыахха уонна эппиэтинэс туһунан санатыахха наада», - диэтэ Егор Кардашевскай.