Эдэр ыаллары дьиэнэн хааччыйыы – тыын суолталаах

«Дьиэ-уот сыһыаннаһыыларыгар департамент» МХТ дириэктэрэ Евгения Пак «2020-2024 сылларга «Дьокуускай куорат» куорат уокуругун нэһилиэнньэтин дьиэнэн хааччыйыы» муниципальнай бырагыраама «Эдэр ыаллары дьиэнэн хааччыйыы» хос бырагырааматын 2022 сыл 9 ыйдааҕы туолуутун уонна төрдүс кыбаартал былааннарын туһунан билиһиннэрдэ.

Евгения Пак бэлиэтээбитинэн, 2022 сылга хос бырагыраама олоххо киириитигэр 61,7 мөлүйүөн солкуобай көрүллүбүт. Үбүлээһиҥҥэ олоҕуран, быйыл социальнай төлөбүр испииһэгэр 25 дьиэ кэргэн бигэргэтилиннэ.

«Биэдэмистибэлэр икки ардыларынааҕы хамыыһыйаҕа, быйыл от ыйын 1 күнүгэр, эбии  4 ыал бигэргэтилиннэ. Түмүккэ, барыта 29 дьиэ кэргэн бигэргэтилиннэ, кинилэргэ 29 сертификат туттарылынна. Алтынньы 18 күнүнээҕи дааннайдарынан, итинтэн 27 ыал уопсайа 57,8 мөлүйүөн солкуобай суумалаах сибидиэтилистибэлэрин туһаммыттар», - диэн иһитиннэрдэ  «Дьиэ-уот сыһыаннаһыыларыгар департамент» МХТ дириэктэрэ.

Кини эппитининэн, «Эдэр ыаллары дьиэнэн хааччыйыы» хос бырагыраама олоххо киириитин чэрчитинэн, дьиэ оросчуоттаммыт сыанатыттан 30-35% кээмэйдээх  социальнай төлөбүр бэриллэр. Дьиэ иэнин 1 кв. миэтэрэтин сыаната РФ Тутууга уонна олох-дьаһах хомунаалынай хаһаайыстыбатын министиэристибэтин бирикээһигэр олоҕуран, Биэдэмистибэлэр икки ардыларынааҕы хамыыһыйанан бигэргэтиллэн оҥоһуллар. 2022 сылга субсидияны ааҕарга 1 кв. миэтэрэ сыаната 92,7 тыһыынча солкуобайга тэҥнэспит.