Эдэр худуоһунньуктар үлэлэрин балыыһаҕа бэлэхтиэхтэрэ
Аан дойдутааҕы Аҕам саастаах дьон күнүн көрсө уонна көрөр-харайар сиэстэрэлэр салаалара арыллыбыта биир сылынан Л.А. Ким аатынан Оҕо художественнай оскуолатын үөрэнээччилэрэ үлэлэрин Өрөспүүбүлүкэтээҕи 3 №-дээх клиническай балыыһаҕа бэлэхтиэхтэрэ диэн балыыһа пресс-сулууспата иһитиннэрдэ.
Уруһуйдьут оҕолору худуоһунньук, Л.А. Ким аатынан Оҕо художественнай оскуолатын преподавателэ Эдита Степанова үөрэтэр. Кини иһитиннэрбитинэн, «Долгожить» автономнай кэмиэрсийэтэ суох тэрилтэ (салайааччы Наталия Каратаева) ыытар «Солнечный круг» аһымал аахсыйатын чэрчитинэн оҕолор кылааһынан балыыһа кырдьаҕас дьону көрөр-истэр стационарыгар өстүөкүлэҕэ витражнай уруһуйу бэлэмнииллэр.
Эдита Степанова эппитинэн, 10 чаастан турар уопсай панно баар буолуоҕа. Эдэр худуоһунньуктар уонна преподавателлэрэ кинилэр үлэлэрэ балыыһа ис бараанын киэргэтиэҕэ уонна саастаах дьон настырыанньаларын көтөҕүөҕэ диэн эрэнэллэр.
Сонуннар
Ордук ааҕаллар
