Эбээһинэһин толорбот салайар хампаанньаны сылга биирдэ уларытыахха сөп

2023 сыл атырдьах ыйын 4 күнүнээҕи 434-ФЗ №-дээх федеральнай сокуонунан РФ Дьиэ-уот кодексын 162 ыст. 8.2 чааһыгар уларытыылар киирбиттэрэ.
Ол курдук, дьиэни бас билээччилэр салайар хампаанньаларыттан сылга бииртэн элбэҕэ суох аккаастанар бырааптаахтар. 
Хаарчахтыыр болдьох дьиэни бас билээччилэр салайар хампаанньаны талыыга эппиэтинэстэрин үрдэтэр сыалтан олохтонор. Сокуоҥҥа маннык уларытыы 2023 сыл атырдьах ыйын 15 күнүттэн киирбитэ.
Ол эрээри бу уларыйыы дьиэни бас билээччилэр салайыы ньыматын уларытар бырааптарыгар тарҕаммат. Ол эбэтэр ТСЖ тэринэргэ дуу, салайар хампаанньаны таларга дуу хаарчах суох. Өссө биир түгэнинэн салайар хампаанньаттан эбээһинэһин толорбот түбэлтэтигэр аккаастаныы буолар. Ол эбэтэр сылы быһа кэтэһэргэ төрүөт суох. 
Бэлиэтээн эттэххэ, салайар хампаанньаны кытта сөбүлэҥ түһэрсэр эбэтэр сөбүлэҥи көтүрэр дьиэни бас билээччилэр уопсай мунньахтарынан быһаарыллар, диэн иһитиннэрэр Олохтоох дьаһалта муниципальнай инспекцияҕа управлениета.