Дыгын оонньуулара-2023: Түөрт путевка баар!

Аны сайын буолуохтаах Дыгын оонньууларыгар сүүмэрдиир күрэхтэһиилэр муус устар 4-5 күннэригэр «Триумф» спорт комплексыгар буолан аастылар. Уопсайа өрөспүүбүлүкэ араас улууһуттан 23 спортсмен кыттыыны ылла. 
Таатта улууһун бэрэстэбиитэлэ Николай Матаннанов бары көрүҥнэргэ бастакы алта иһигэр сырытта: ыстаныы – алтыс миэстэ, тутум эргиир – бэһис, мас-рестлинг – үһүс, оҕунан ытыы – алтыс, сүүрүү – алтыс, хапсаҕай – төрдүс, тааһы көтөҕүү – иккис. Уопсай түмүккэ бастакы миэстэ буолла. 
Ньурба бэрэстэбиитэлэ Николай Обоев иккис миэстэҕэ таҕыста, Үөһээ Бүлүүттэн Айхал Бюлтясов – үһүс. Петр Прудецкай төрдүс миэстэни ааттаах-суоллаах Атрем Варданяны тааһы көтөҕүүгэ баһыйа тутан, кыл-мүччү биир очконан мүччү туттарда.
Дыгын оонньууларыгар өссө биир сүүмэрдиир түһүмэх муус устар бүтүүтүгэр буолуоҕа. Онно эмиэ түөрт бастыҥы быһаарыахтара. 
Путевкалары бу иннинэ Горнайтан Дьулустан Ноговицын, Кэбээйиттэн Алексей Уваровскай, Намтан Вячеслав Дьяконов уонна Үөһээ Бүлүүттэн Айсен Ботуев туппуттар.