Дуобакка суперматч кыайыылааҕынан Матрена Ноговицына буолла

Эрийсиилээх киирсиини «Саха» НКИХ уонна БСТ (Башкортостан) быһа эфиргэ, итиэннэ ютуб-ханаалга көрдөрдүлэр.

«Өрөспүүбүлүкэбитигэр дуобат классическай бырагырааматыгар итинник үрдүк таһымнаах аан дойду чемпиона баара – улахан үөрүү. Ити түбэлтэ Саха сирин историятыгар бастакы, Арассыыйа историятыгар – иккис төгүлүн буолла. Биһиги өттүбүтүттэн өйөбүл баар», – диэн бэлиэтиир Ил Дархан Айсен Николаев.

Өрөспүүбүлүкэ вице-премьера Сергей Местников иһитиннэрбитинэн, ити бырайыагы биэс сыл анараа өттүгэр Үүнэр көлүөнэ целевой пуондата, өрөспүүбүлүкэ Дуобакка федерацията уонна «Саха» НКИХ кыттыһан толкуйдаабыттар.

«Өрөспүүбүлүкэҕэ дуобат сайдар кэскилэ улахан, элбэх биллиилээх спортсмен баар. Итини киэҥ араҥаҕа таһаарыы спорт бу көрүҥэр болҕомтону тардарга дьоһун суолталаах», – диэтэ вице-премьер.

Вице-премьер Сергей Местников кыайыылаах Матрёна Ноговицынаҕа 150 тыһыынча солкуобайдаах сертификаты, оттон матч кыттыылааҕар – 50 тыһыынча солкуобайы туттарда. Бириис пуондата – 200 тыһыынча солкуобай.