«Дьулуур» — кыайыы кэрэһитэ

Спартакиада үөрүүлээхтик аһыллыытыгар – түмсүү, күүс көстүүтэ

Спартакиада сылдьыбыт, көрбүт дьоҥҥо, кыттааччыга өтөрүнэн умнуллубат үтүө өйдөбүллэри, сөҕүүнү-махтайыыны сахта, күүһү-эрчими эптэ, олоххо тапталы, кыайыыга-хотууга дьулууру үөскэттэ. Суолтата улахана, ис хоһоонун дириҥэ оччо. Этиҥнээх, чаҕылҕаннаах курулас да ардах спорка анаммыт сүдү дьаһалы тохтотор кыаҕа суох буолла.

Киэҥ нэлэмэн Сахабыт сирин 24 улууһуттан доруобуйаларыгар хааччахтаах 816 спортсмен Спартакиада үөрүүлээх быһыыга-майгыга аһыллыытыгар былаахтарын, гербэлэрин өрө туппут арыалдьыттардаах, улуустарын баһылыктарын кытта киирбиттэрин көрөөччүлэринэн, ыалдьыттарынан туолбут “Амма-Олимп” стадион тырыбыналара дохсун ытыс тыаһынан көрүстүлэр!

2019 с. Аммаҕа ыытыллыбыт Саха сирин норуоттарын спортивнай оонньууларын  талисманнара – Кыыс Амма, буспут саһарҕай Бурдук, уот кыһыл Сардаана сибэкки, тэтэркэй Дьэдьэн, итиэннэ Адаптивнай спорт көрүҥнэригэр спартакиада талисмана – эр санааны, дьулууру, олох бары мэһэйдэрин туоруур сымара Таас Хайа хонууга сүүрэн киирэннэр, түһүлгэни киэргэттилэр.

Ил Дархан Айсен Николаев истиҥ-иһирэх эҕэрдэтигэр доруобуйаларыгар хаарчахтаах спортсменнар, пара-сурдолимпиецтэр барыбытыгар холобур буолалларын,  инникитин материальнай базаны бөҕөргөтөр, чуолаан, адаптивнай спорт уонна буулдьанан ытыы кииннэрин тутар, инфраструктураны тупсарар соруктар туралларын, спартакиада хас биирдии кыттааччыта номнуо кыайыыны ситиспитинэн ааҕылларын  туһунан этиитэ өйгө-санааҕа дириҥник сөҥнө.

Стадиоҥҥа туруоруллубут сүүнэ экран нөҥүө Арассыыйа спорка миниистирэ Олег Матыцин, Спартакиада бочуоттаах ыалдьыттара, Арассыыйа Паралимпийскай кэмитиэтин вице-бэрэсидьиэнэ, Паралимпийскай оонньуулар уонна футболга аан дойду үс төгүллээх чөмпүйүөнэ  Иван Потехин, Адаптивнай спорка Арассыыйа сүүмэрдэммит хамаандатын бэлэмниир управление уонна Киин салайааччылара Михаил Колмыков, Евгений Першин, Амма улууһун баһылыга Степан Кузьмин эҕэрдэлэрэ сүргэни көтөхтүлэр.

Харахтарынан көрбөттөргө пауэрлифтиҥҥэ Арассыыйа чөмпүйүөнэ Айаал Данилов, көрбөт спортсменнарга дуобакка аан дойду уонна Европа чөмпүйүөнэ Александр Ефимов, сүһүөхтэринэн доруобуйаларыгар хаарчахтаах спортсменнарга пауэрлифтиҥҥэ аан дойду уонна Европа чөмпүйүөнэ, дьаадыраны анньыыга уонна копьены быраҕыыга Арассыыйа чөмпүйүөнэ Айаал Сивцев, остуол тенниһигэр Арассыыйа чөмпүйүөнэ, Паралимпиецтэр норуоттар икки ардыларынааҕы сайыҥҥы оонньууларын кыайыылааҕа Михаил Неустроев, олорон эрэ волейболга Арассыыйа үс төгүллээх боруонса призера, сүһүөхтэринэн доруобуйаларыгар хаарчахтаах Бүтүн Арассыыйатааҕы устудьуоннар бэстибээллэрин чөмпүйүөнэ Никита Лобанов Спартакиада былааҕын көтөхтүлэр.

Адаптивнай спорт көрүҥнэригэр Паралимпийскай оонньуулар үрүҥ көмүс уонна боруонса призердара тустууктар Прокопий Николаев, Василий Стрекаловскай, волейболистка Алена Дмитриева, пауэрлифтер Владимир Балынец, охчут Степанида Артахинова, харбыыһыт Анастасия Диодорова, паралимпиецтэри бэлэмнээбит үтүөлээх тренердэр Петр Давыдов, Василий Стручков уоттаах факелы эр-биир тутан аҕалан дьаадыраһыт Виктория Петроваҕа туттардылар. Амма киэн туттуута Виктория Петрова  Спартакиада уотун күлүбүрэччи уматан, Спартакиада аһыллыбытынан биллэрилиннэ!

Чаҕылхай түгэннэр

Доруобуйаларыгар хааччахтаах спортсменнар күрэхтэһиилэрэ үс хайысханан – сүһүөхтэринэн, истибэттэргэ уонна көрбөттөргө – араарыллан, чэпчэки атлетика “Олимп” стадионугар ыытылынна, олорон эрэ волейбол уонна дуобат – Сахаачча аатынан спорт комплекска, остуол тенниһэ – “Дружба” спорт саалатыгар, буулдьанан ытыы — Чапчылҕан, голбол Бөтүҥ спортивнай комплекстарыгар тэрилиннилэр.

“Спорт королеватынан” биллэр чэпчэки атлетика быһыйдара күн-дьыл туругуттан толлубакка, ардахтан, тыалтан-куустан мэһэйдэппэккэ, айылҕа тургутуутун эрдээхтик аастылар. Көрүҥнэр аайы күннэтэ кыайыылаахтар, чөмпүйүөннэр быһаарыллан истилэр. Бастыҥнар хамаандаларыгар, төрөөбүт-үөскээбит улуустарыгар кыайыы үөрүүтүн бэлэхтээтилэр. Арассыыйа хастыы да төгүллээх чөмпүйүөннэрэ ааттарын-суолларын түһэн биэрбэтилэр. Быһыйдары үтүөлээх тренер Василий Андреевич Оленов эрчийэр, дойду киин куораттарыгар илдьэ сылдьан күрэхтэһиннэрэр.

Маҥнайгы кыһыл көмүс мэтээли кэлээскэлээхтэр 100 м куоталаһыыларыгар Дьокуускайтан Лилия Егорова аҕалла, дьаадыраны анньыыга эмиэ бастаата. Иккилии көрүҥҥэ бастаабыт спортсменнар ортолоругар Варвара Наумова (Горнай),  Татьяна Бурым (Дьокуускай), Роман Ибрагимов (Кэбээйи), Саргылан Семенов (Уус Алдан), Альберт Петров (Эдьигээн), Николай Свинобоев (Ньурба), Никифор Анисимов (Мэҥэ Хаҥалас) Спартакиада дьоруойдара буоллулар. Дьаадыраны анньыыга кыһыл көмүс мэтээлинэн наҕараадаламмыт олорон эрэ волейболга аан дойду чөмпүйүөнэ Алена Дмитриева Сунтаар хамаандата волейболга үһүс бириистээх миэстэҕэ тиксэригэр улахан төһүү буолла, Спартакиада иккис мэтээлин ылары ситистэ.

400 м уонна 800 м курдук ыарахан дистанцияларга сүүрүүлэргэ истибэттэргэ кыраһыабай, чэпчэки сүүрүүнү Ньурба 20 саастаах быһыйа Николай Свинобоев көрдөрдө. Хара ааныттан ылбыт тэтимин быспакка, сүүрүүтүн эптэр эбэн, ааспыт үйэ 60-70-с сылларыгар күннээн-күөнэхтээн сүүртэлээбит Чурапчы-Мэҥэ уҥмат тыҥалааҕа Афанасий Илларионовы санатар дьыпсаан көрүҥнээх. Илиилэрин-атахтарын сылбырҕатык ылаттаан, утарсааччыларын ырааҕынан быраҕаттаата. Николай бу күннэргэ Арассыыйа чемпионатыгар барарга бэлэмнэнэр. Сурдолимпийскай оонньууларга кыттар баҕалаах. Кыайыытын спорка аҕалбыт тренерэ Василий Оленовка анаата.

Кэлээскэлээхтэргэ Хаҥалас Мохсоҕоллооҕуттан дэгиттэр спортсмен Ринат Жангиров биэтэккэ бастакынан кэллэ. Дзюдонан дьарыктанар эдэр киһи аҕыйах сыллааҕыта мас эрбиир электрическэй станокка кроссовкатын быатыттан хаптаран, быһыта эрийтэрэн, икки атаҕа суох хаалбыт. Эр санаалаах спортсмен номнуо протез оҥорторон, салгыы армлифтининэн дьарыктаммыт. Саха сирин, Арассыыйа чөмпүйүөннэрэ буолары ситиспит. Урбаанньыт быһыытынан оҕолорго спортивнай балаһаакка оҥорон бэлэхтээбит. Ринат бу Спартакиадаҕа кыайыытын түөрт саастаах игирэ кыргыттарыгар, тапталлаах кэргэнигэр, күн-күбэй ийэтигэр, бииргэ төрөөбүт балтыгар анаата.

Чэпчэки атлетикаҕа хамаанданан түмүккэ сүһүөхтэринэн ыалдьааччыларга – Ньурба, Дьокуускай, Бүлүү; истибэттэргэ – Эдьигээн, Дьокуускай, Ньурба; көрбөттөргө Үөһээ Бүлүү, Чурапчы, Дьокуускай туһааннааҕынан бастакы, иккис, үһүс миэстэлэри ылаттаатылар.

Остуол тенниһигэр сүһүөхтээхтэргэ – Ньурба, Мэҥэ Хаҥалас, Дьокуускай; истибэттэргэ – Дьокуускай, Ньурба, Сунтаар; биирдиилээн оонньооччуларга эр дьоҥҥо –  Айгимар Нифонов (Бүлүү), Андрей Цыпандин (Мэҥэ Хаҥалас), Роман Николаев (Дьокуускай), дьахталларга Екатерина Сивцева (Амма), Туйаара Иванова (Ньурба),  Ульяна Максимова (Дьокуускай) үс бастыҥнарга киирдилэр.

Буулдьанан ытыыга хамаанданан түмүккэ сүһүөхтээхтэргэ Бүлүүттэн Надежда Алексеева, Василий Прокопьев, Чурапчыттан Анастасия Егорова, Николай Пермяков бастаатылар; Нерюнгриттэн Олеся Бояршинова, Роман Бычев састааптаах хамаандалар иккис уонна үһүс буоллулар. Биирдиилээн ытыыларга сүһүөхтээхтэргэ Олеся Слепцова (Орто Халыма) бастаата, Сабия Иванова (Сунтаар) – иккис, Надежда Алексеева (Бүлүү) – үһүс, истибэттэргэ Алексей Стручков (МэҥэХаҥалас), Василий Прокопьев (Бүлүү), Роман Бычев (Нерюнгри) инники күөҥҥэ таҕыстылар.

Дуобакка сүһүөхтээхтэргэ – Мэҥэ Хаҥалас, Дьокуускай, Чурапчы, истибэттэргэ – Таатта, Нам, Чурапчы; олорон эрэ волейболга эр дьоҥҥо аммалар бастаатылар, Үөһээ Бүлүү – иккис, Мэҥэ Хаҥалас үһүс миэстэлэннилэр; дьахталларга Мэҥэ Хаҥалас, Дьокуускай, Чурапчы хамаандалара бастакы, иккис, үһүс бастыҥ көрдөрүүлэннилэр. Көрбөттөр голболга сытыы киирсиилэригэр эр дьоҥҥо – Дьокуускай, Үөһээ Бүлүү, Нам, дьахталларга Мэҥэ Хаҥалас, Ньурба, Сунтаар хамаандалара кыһыл көмүс, үрүҥ көмүс, боруонса мэтээллэри ылаттаатылар.

Спартакиада түмүгүн таһаарыы, үөрүүлээхтик сабыллыытын үгэнигэр Амма улууһун баһылыга, бэйэтин кэмигэр мас тардыһыытыгар өрөспүүбүлүкэ чөмпүйүөнэ, спорт куттаах Степан Николаевич Кузьмин Спартакиада былааҕын Бүлүү улууһун баһылыга Сергей Иннокентьевич Винокуровка туттарда. Сергей Иннокентьевич хардатын: “Спартакиада олус үрдүк тэрээһиннээхтик барда. 2026 с. биһиэхэ  буолуохтаах Спартакиадаҕа бэлэмнэниини күн сарсыҥҥыттан саҕалыахпыт. Бастатан туран, материальнай базабытын хаҥатыахпыт, куораппытын киэргэтиэхпит, саҥа спорт объектарын тутуохпут. Спартакиадабытын Аммаҕа барбытын курдук үрдүк таһымҥа ыытыахпыт»,– диэн эрэннэрдэ.

Бүлүүгэ көрсүөххэ диэри!