Дьону быыһыыр ураты үгэстээх Юргиннар 

СӨ Быыһыыр сулууспатын 30 сыллаах историятын биир киэн туттуута — Юргиннар дьиэ кэргэн. Олунньу 22 күнүгэр Ыксаллаах быһыыны-майгыны сэрэтэр киин дьиэтигэр кинилэргэ аналлаах хаартыска быыстапката арылынна.
Уу эбийиэктэригэр көрдүүр-быыһыыр үлэни ыытар уонна ыксаллаах быһыыны-майгыны суох оҥорор управление начаалынньыгын солбуйааччы Андрей Юргин, уу анныттан көрдүүр-быыһыыр салаа начаалынньыга Юрий Юргин, Дьокуускай куораттааҕы гражданскай оборуонаҕа уонна ыксаллаах быһыыга-майгыга управление үлэһитэ Дмитрий Юргин — аныгы үйэ дьиҥнээх дьоруойдара, дьиэ кэргэн үтүө үгэстэрин тыыннаах холобурдара.

СӨ Быыһыыр сулууспатын начаалынньыга Иннокентий Андросов быыстапканы үөрүүлээхтик арыйыыга Юргиннар, биир дьиэ кэргэн биир сомоҕо буоллаҕына, ханнык да ыарахантан кыайыылаах тахсыы холобурун көрдөрөллөрүн, тоҕо диэтэххэ дьиҥнээх өйөбүл дьиэ кэргэнтэн саҕаланарын бэлиэтээтэ. 
«Дьону быыһааһын — дьиэ кэргэн үгэһэ» хаартыска быыстапката быыһааччы ыарахан үлэтин көрдөрөрүн таһынан, атын дьон олоҕун быыһыыр, бэйэ олоҕун уопсастыбаҕа аныыр үрдүкү сыаннас буоларын чорботор аналлаах. Ол курдук, хас биирдии хаартыска көрөөччүнү дьоруойдуу быһыыга кынаттыыр, киэн туттуу иэйиитинэн кууһар ураты тыыннаах. 

Арассыыйаҕа биллэриллибит Дьиэ кэргэн, СӨ Оҕо аймах сылларынан  тэриллибит быыһааччы Юргиннар туһунан быыстапка дьиэ кэргэн сыаннастарын, үтүө үгэстэрин көлүөнэттэн көлүөнэҕэ тиэрдэр суолтатын көрдөрөр.
Быыстапканы кулун тутар 31 күнүгэр диэри СӨ Ыксаллаах быһыыны-майгыны сэрэтэр киин дьиэтигэр көрүөххэ сөп, диэн иһитиннэрэр СӨ Быыһыыр сулууспатын пресс-киинэ.