Дьокуускайга тутуу быыстапката арылынна

Бүгүн, кулун тутар 1 күнүгэр, киин куоракка «Хотугу стройиндустрия. Энергетика. ОДьКХ» диэн 20 сыл устата ыытыллар регионнар икки ардыларынааҕы быыстапка арылынна.

Өр сыллар тухары быыстапка куорат олохтоохторун ити эйгэ сонун технологияларынан үөрдэр, олус туһалаах информациянан үллэстэр, уопут атастаһар балаһаакканан буолар.

Сылын ахсын тэрээһиҥҥэ Арассыыйа регионнарын бэрэстэбиитэллэрэ кытталлар. Быйылгы быыстапка сүрүн тиэмэтэ – омук сириттэн кэлэр тэриллэри солбуйуу, дойду иһигэр оҥоһуллубут тэрил кыаҕын көрдөрүү, олохтоох оҥорон таһаарыыны сайыннарыы, саҥа суоллары тобулуу.

Кыттааччылар ортолоругар хайысхаларынан идэлэрин толору баһылаабыттар бааллар, холобур, мас дьиэ тутуутугар. Кинилэртэн бэлэм тутуллубут дьиэ бырайыагын,  инженернэй коммуникациялар, араас технологиялар тустарынан билсиэххэ, итиэннэ дизельнэй уонна электрическэй генератордары, анал тиэхиньикэни, саппаас чаастары атыылаһыахха сөп.

Итини сэргэ регионнар бэрэстэбиитэллэрэ топиари уонна «ажурнай уоттаах пуормалар», ол иһигэр дойду сүрүн харыйатын киэргэтиитин туһунан кэпсиэхтэрэ.  

Өрөспүүбүлүкэ дьоҕус тэрилтэлэрэ пластиктан оҥорор тэриллэрин, бассейннарын, септиктэрин уо.д.а көрдөрүөхтэрэ.

Арассыыйа бөдөҥ хампаанньалара гражданскай уонна промышленнай суолталаах тимир оҥоһуктарын билиһиннэриэхтэрэ.

Быыстапка чэрчитинэн семинардар, төгүрүк остуоллар, маастар-кылаастар, итиэннэ үлэ миэстэтин дьаарбаҥката ыытыллыаҕа.

Тэрээһин кулун тутар 1-3 күннэригэр ыытыллар, киирии – босхо.

Аадырыһа: Дьокуускай к., Киров уул., 20/1, 2-с этээс, «Модун» СК.  Тэрийэр кэмитиэт: 8 (4112) 42-24-02