12.10.2022 | 19:30

Дьокуускайга үһүс стадион тутуллуон сөп

Дьокуускайга үһүс стадион тутуллуон сөп
Ааптар: Баһылай ПОСЕЛЬСКАЙ

Ааспыт нэдиэлэҕэ Саха Өрөспүүбүлүкэтин физическэй култуураҕа уонна спорка министиэристибэтин иһинэн үлэлиир Уопсастыбаннай сэбиэт  уочараттаах сүбэ мунньаҕа икки боппуруоһу көрдө.

Физкултуура уонна маассабай спорт сайдыытыгар спорт миниистирин 1-кы солбуйааччы Александр Бугаев, Агротехнологическай университет ипподромугар стадион тутуутун туһунан АГАТУ тутууга сүрүн инженерэ Петр Обутов иһитиннэриилэри оҥордулар. Сүбэ мунньаҕы Уопсастыбаннай сэбиэт бэрэссэдээтэлэ Дмитрий Платонов салайан ыытта.

Бастакы боппуруоска нэһилиэнньэ, дьон доруобуйатын тупсарыыга физкултуурунай-чэбдигирдэр, чөл олоҕу өрө көтөҕүүгэ Арассыыйа спорка министиэристибэтин бырайыактара холобур быһыытынан аҕалылыннылар. Николай Бугаев ыйытыыларга хоруйдаата, боппуруос сүнньүнэн кэпсэтиилэр буоллулар. Хамсатыылаах дьаһаллары ыытарга, үбүлээһини булууга Тыа хаһаайыстыбатын, Үөрэх, Доруобуйа харыстабылын, Физическэй култуура уонна спорт, Ыччат министиэристибэлэрэ бииргэ үлэлииллэрэ наадатыгар болҕомто уурулунна.

2030 сылга диэри чэбдигириинэн дьарыктанааччылар, ол иһигэр спордунан дьарыктанар оскуола оҕолорун ахсаана элбиэхтээх. Маныаха спортивнай медицина өҥөтө, хас биирдии нэһилиэккэ физкултуура-спорт инструктордара баар буолуулара ситиһиллиэхтээх. Уопсастыбаннай сэбиэт дьону, нэһилиэнньэни кытта чопчу үлэни ыытыаҕа. Оҕолорбут, дьон-сэргэ доруобуйалара – бу барыбыт дьыалата буоларынан, нэһилиэктэр, бөһүөлэктэр көхтөөхтүк ылсыыларыттан, өйөөһүннэриттэн эмиэ тутулуктаныаҕа.

Агротехнологическай судаарыстыбаннай университет ипподромун ортотугар стадион бырайыагын туһунан АГАТУ сүрүн инженерэ Петр Обутов иһитиннэриитэ сэргэхсийиини үөскэттэ.

Өскөтүн, стадион бырайыага сиһилии быһаарыллан, экраҥҥа көрдөрүллүбүтүн курдук олоххо киирдэҕинэ, туһааннаах университет устудьуоннара, преподавателлэрэ, тренердэрэ, бары үлэһиттэрэ эрэ буолбакка, чугастааҕы уокуруктар, “Прометей” кыбаартал, куорат таһынааҕы бөһүөлэктэр олохтоохторо дьарыктаналларыгар, доруобуйаларын тупсарыналларыгар саарбахтааһын суох. 300 тыһыынчаттан тахса  нэһилиэнньэлээх уһук хотугу кыраайбыт киин куората Дьокуускай үс аһаҕас стадионнанан, улахан таһымнаах култуурунай-спортивнай дьаһаллары, ол иһигэр “Азия оҕолоро” оонньуулары да ыытарга табыгастаах буолуо этэ.

АГАТУ ректора Валерий Федоров номнуо боччумнаах кэпсэтиилэри ыыппыт, өйдөөһүн, өйөөһүн баар эбит. Өрөспүүбүлүкэбит үрдүкү салалтата ылыннар эрэ, киин куораппытыгар үһүс стадионнаныахпытын сөп.

Көрүллүбүт боппуруостарга рекомендациялар ылылыннылар. Ити курдук, физическэй култуура уонна спорт кэскиллээхтик сайдан иһиилэригэр сэргэх, күүстээх үлэлэр бараллар. Ону бастыҥ спортсменнарбыт чаҕылхай ситиһиилэринэн мэктиэлииллэр. Болҕомто нэһилиэнньэ бүттүүнэ чэгиэн-чэбдик, чөл туруктаах буолуутугар туһаайыллар.

Сонуннар

Ордук ааҕаллар

Николай Винокуров:  «Дойдубар этэҥҥэ эргиллэн кэллим...»
Дьон | 19.11.2022 | 18:00
Николай Винокуров: «Дойдубар этэҥҥэ эргиллэн кэллим...»
«Боотур» этэрээт байыастарын ортотугар биһиги биир дойдулаахпыт Алаһыай нэһилиэгиттэн төрүттээх Николай Винокуров баарын истэн, кэпсэтиэхпин баҕардым. Ол эрэн сэһэргэһиибин хайдах-туох саҕалыахпын тобуларбар олус ыарахан этэ. Бу үлэ, үөрэх, сайдыы, тэрээһин туһунан суруйуу, кэпсэтии буолбатах... Бу — олох, дьылҕа, тыын былдьаһыы, өлүү-сүтүү, инники олох иһин охсуһуу туһунан сэһэргэһии. Николай тута хоруйдаабытыгар...
Халбаакыттан — Олоҥхо тыйаатырыгар
Дьон | 25.11.2022 | 10:20
Халбаакыттан — Олоҥхо тыйаатырыгар
Дьокуускайга саха тылын учууталларын сийиэстэрин сэргэ өрөспүүбүлүкэтээҕи Олоҥхо декадата ыытылла турар. Оттон чулуу айымньыбыт баай философиятын кэлэр ыччакка тиэрдэр биир бэртээхэй ньыманан тыйаатыр буолар. Бу дьыл сэтинньитигэр Олоҥхо тыйаатыра «Дьорҕостой Бэргэн» куукуланан испэктээк туруоран сүрэхтээбитэ. Режиссер Гаврил Мэҥкээрэп Николай Калинович Шамаев-Чопчухаан (Үөһээ Бүлүү) олоҥхотунан туруоруутун Дьокуускай куорат хас да уһуйааныгар...
Мария Матвеева:  «Дьоҥҥо үтүөнэн эрэ сырыттахха, олорорго чэпчэки»
Дьон | 26.11.2022 | 10:00
Мария Матвеева: «Дьоҥҥо үтүөнэн эрэ сырыттахха, олорорго чэпчэки»
Тыа сиригэр көмүс куоластаахтар, үҥкүүһүттэр, айар, суруйар дьон баалларын куруук кэрэхсии, сэргии истэбит. Ханна да сырыттарбын талааннаах дьону кытта билсэрбин, санаа атастаһарбын туохтааҕар да ордоробун.
Элэгэнтэй Адамов:  «Сиэрдээх өй-санаа төрүт дьарыкка эрэ баар»
Дьон | 20.11.2022 | 11:00
Элэгэнтэй Адамов: «Сиэрдээх өй-санаа төрүт дьарыкка эрэ баар»
Бүгүҥҥү нүөмэргэ Чурапчы улууһун Чакыр нэһилиэгин олохтооҕо Элэгэнтэй Адамовы кытта тыа сирин олоҕун, итэҕэл, уус идэтин, сайдыы, норуот дьылҕатын, кэскилин туһунан сэһэргэстибит. Дьоҕурдаах киһи анаарыыта киэҥэ, этэр тыла оруннааҕа сөхтөрдө.