Дьокуускайга муус уонна хаар оҥоһуктар күрэхтэрэ ыытыллар

Тэрээһин сылын аайы Бүтүн Арассыыйатааҕы «Кыһын Саха сириттэн саҕаланар» бэстибээл чэрчитинэн ыытыллар. Күрэх тэрийээччилэрэ – Олохтоох дьаһалта уонна «Северное сияние» муус паарката.

Маастардар блицтурнир кэмигэр Орджоникидзе болуоссакка уонна 202-с дьоҕус оройуоҥҥа «Северное сияние» муус пааркаҕа муустан уонна хаартан скульптуралары оҥоруохтара.

Быйылгы блицтурнир 2024 сылга ыытыллыахтаах VIII-с «Азия оҕолоро» норуоттар икки ардыларынааҕы оонньууларга ананыаҕа. «Северное сияние» муус пааркаҕа маастардар кэлэр кэскил эйгэтин дьүһүйүөхтэрэ. Хаар оҥоһуктар тиэмэлэрин ааптардар бэйэлэрэ талаллар.

Урукку сылларга курдук, куонкурус кыттыылаахтарынан идэтийбит худуоһунньуктар, скульптордар, самодеятельнай худуоһунньуктар, прикладной искусство маастардара, Арассыыйа уонна тас дойдулар үрдүк үөрэх кыһаларын, колледжтарын, училищеларын устудьуоннара уонна  преподавателлэрэ буолуохтара.

Куонкурус түмүгүнэн кыайыылаахтар кубоктарынан, өйдөбүнньүк дипломнарынан уонна харчынан бириистэринэн наҕараадаланыахтара.

Орджоникидзе болуоссакка ыытыллыбыт блицтурнир муус оҥоһуктарын кыайыылааҕа 60 000 солкуобайынан наҕараадаланыаҕа. Иккис миэстэҕэ – 50 000 солкуобай, үһүскэ – 40 000 солкуобай бэриллиэҕэ. Итини сэргэ үс номинация кыайыылаахтара 10 000 солкуобайы ылыахтара.

«Северное сияние» муус пааркатын кыайыылаҕа 150 000 солкуобайынан наҕараадаланыаҕа. Иккис миэстэҕэ – 100 000, үһүскэ – 70 000 солкуобайы биэриэхтэрэ. Итиэннэ үс номинация кыайыылаахтара 10 000 солкуобайынан наҕараадаланыахтара.

Хаар оҥоһуктар кыайыылаахтара 90 000 солкуобайы ылыаҕа. Иккис миэстэҕэ – 70 000, үһүскэ – 50 000 солкуобайга тиксиэхтэрэ. Үс номинация кыайыылаахтара 10 000 солкуобайынан наҕараадаланыахтара.

Үс куонкуруска кыттан баран бириистээх миэстэҕэ тиксибэтэх хамаандалар, дипломнарын сэргэ, 40 000 солкуобайы ылыахтара.

Күрэххэ кыттарга сайаапкалары уонна үлэ эскииһин 2023 сыл сэтинньи 12 күнүгэр диэри маннык аадырыска туталлар: Дьокуускай куорат, Ленин пр., 15, 104-с кэбиниэт, билсэр төлөпүөн: +7(4112) 40-80-52, эл. почта аадырыһа: cultura521@mail.ru.