Дьокуускайга маастар-былааннааһын үөрэҕэ ыытыллар

Арктическай судаарыстыбаннай култуура уонна искусство института, «Приоритет-2030. Уһук Илин» стратегическай бырайыак чэрчитинэн, маастар-былааннааһыҥҥа эбии профессиональнай үөрэхтээһин бырагырааматын саҕалыырын биллэрдэ. Бырагыраама 2023 сыл алтынньы 21 күнүгэр, «Үлэ кыбаартала» креативнай кластерга саҕаланар. Институту кытта бырагырааманы Universal University, «МАРШ» архитектурнай оскуола, «Новая земля» бырайыактыыр-консалтинговай хампаанньа, СӨ Архитектураҕа управлениетын уонна «LETO» куорат эйгэтин боппуруостарыгар компетенция киинин өйөбүллэринэн оҥордулар.

Бырагыраама кыттааччылара – Саха сиринээҕи үрдүк үөрэх кыһаларын устудьуоннара уонна магистраннара, министиэристибэлэр, муниципальнай тэриллиилэр салайааччылара уонна үлэһиттэрэ, территориялары сайыннарар корпорациялар уонна тутуу тэрилтэлэрин бэрэстэбиитэллэрэ. Үөрэх дьиҥнээх балаһааккаларга тирэҕирэн ыытыллар: Дьокуускай куорат Эргэ куората-2, Тиксии бөһүөлэгэ уонна Кангалаас дьоҕус оройуона.

Манна даҕатан эттэххэ, Уһук Илиҥҥи Федеральнай уокурукка Саха сирэ маастар-былааннааһыҥҥа инники күөҥҥэ сылдьар.