Дьокуускайга ититии сезона түмүктэнэн эрэр

Өлүөнэ мууһа баран сылаас күннэр сатыылаатылар. Онон куорат олохтоохторо ититиини араарарга этии киллэрэллэрэ элбээтэ. Куорат тэрилтэлэригэр, олорор дьиэлэригэр ыам ыйын 20 күнүттэн ититии ситимин арааран барыахтара.

“Кыбартыыра ититиитин араартарарга бэйэҕит салайар хампаанньаҕытыгар сайаапка түһэриэххитин сөп. Дьиэ олохтоохторуттан оннук сайаапка киирдэҕинэ, салайар хампаанньалар техническэй өттүнэн ититиини араарар кыахтаах буоллахтарына, олохтоохтор баҕаларын толоруохтаахтар. Ол эрэн дьиэлэр атын-атын тутуулаахтар, онон биир кыбартыыраҕа аһара итии буоллаҕына, атыттар тоҥо олоруохтарын сөп. ”, - диэн Куорат хаһаайыстыбатын эксплуатациялыыр сулууспа салайааччыта Айаал Егинов кэпсээтэ.

Оттон сокуон ирдэбиллэригэр олоҕуран, ититии  5 күн устата +8 кыраадыс сылаас тураҕына араарыллыахтаах.