Дьокуускайга Го оонньуу бэстибээлэ ыытыллыаҕа

«Го оонньууну оскуола саҕаттан маассабай дьарык оҥоруу – кэрэхсэбиллээх идиэйэ. Ити оонньуу көмөтүнэн оҕо эмиэ математиканан, бырагыраамалааһынынан дьарыктанарын курдук, дьоҕура сайдан, инники өттүгэр ситиһиигэ тиэрдиэҕэ», − диэн бэлиэтээтэ Ил Дархан Айсен Николаев.

Бэстибээл кыттыылаахтара интеллектуальнай оонньуу быраабылаларын үөрэтиэхтэрэ уонна бастакы баартыйалары оонньуохтара. Кинилэри Го оонньуу философиятын уонна историятын, ити оонньууну сайыннарбыт илиҥҥи норуоттар култуураларын кытта билиһиннэриэхтэрэ.

Атырдьах ыйын 26 күнүгэр дойду күүстээх спортсменнара Саха сирин Ил Дарханын кубогын иһин күрэхтэһиэхтэрэ. Күрэх Дьокуускайдааҕы саахымат-дуобат киинигэр ыытыллыаҕа.

Тэрээһин кэмигэр Уһук Илиҥҥи федеральнай уокурук бастыыр иһин күрэҕэ буолуоҕа. Күрэхтэһиигэ 9 саастарыгар диэри уонна 9-11 саастаах, итиэннэ 12-15 уонна 16-19 саастаах кыргыттар, уолаттар кыттыахтара.

Күрэхтэһиигэ Арассыыйа регионнарыттан 140-тан тахса киһи, ол иһигэр 50 оҕо, Казахстантан уонна Польшаттан икки спортсмен кыттара күүтүллэр.

Го — логиканы эрчийэр остуол оонньуута. Араас сабаҕалааһыннарынан, былыргы Кытайга 2-5 тыһыынча сыл анараа өттүгэр үөскээбит. XIX-с үйэҕэ Арҕаа Азияҕа, оттон XX-с үйэҕэ аан дойдуга барытыгар тарҕаммыт.