Дьокуускайга Эрмитаж ыалдьыттыыр

«Эрмитаж күннэрэ» бырайыак чэрчитинэн Дьокуускай олохтоохторугар уонна ыалдьыттарыгар Эрмитаж исписэлиистэрин лиэксийэлэрэ, уруһуй маастар-кылаастара ыытыллыннылар, виртуальнай киинэ тыйаатыра үлэлээтэ. Кырачаан ыалдьыттар “Прогулка по экспозиции с котом Эрмиком” диэн умсугутуулаах бырагыраамаҕа кыттыыны ыллылар.             

Влада Тимофеева, Национальнай художественнай түмэл дириэктэрэ:

—Эрмитаж быыстапкатын Дьокуускайга тэрийэр санаа өссө 2005 сылтан баар, ол эрээри бу сылга барыта табыллан, биһиги түмэлбит тэриллибитэ 95 сылыгар ананна. Быыстапкаҕа 1,5 сыл бэлэмнэммиппит. Бу кылгас кэм иһигэр элбэх үлэ ыытылынна. Эрмитаһы көрсөргө түмэлбит материальнай баазатын бөҕөргөппүппүт, бүтүн этээспитин Эрмитаж ирдэбиллэригэр барсар быыстапка саалатын оҥордубут. Бу быыстапкабыт бастакы уонна тиһэх буолбатыгар эрэнэбит. Эрмитаһы кытта салгыы бииргэ үлэлэһэргэ олук уурулунна. Бу быыстапка туһуттан түмэл үлэлиир эрэсиимин уларытта, өрөбүлэ суох, күн аайы 20:00 чааска диэри үлэлиэҕэ. Онон түмэл кэлэктиибигэр махтанабын.

Быыстапка сүрүн экспоната 18-с үйэҕэ оҥоһуллубут глобус быһыылаах күн чаһыта. Бу императрица Анна Иоанновнаҕа бэлэхтэммит сыаналаах чаһыны Швейцарияттан кэлбит маастар Исаак Брукнер уонна кини үөрэнээччитэ Петр Голицын 1734 сыллаахха оҥорбуттар.

Григорий Ястребинскай, Нуучча култууратын историята салаатын научнай үлэһитэ, “Часы и эпоха” быыстапка куратора:

—Саха сиригэр кэлиэн иннинэ бу чаһы 1988 сылга эрэ Эрмитаж дьиэтиттэн тахсыбыта. Итиэннэ 35 сыл ааспытын кэннэ Дьокуускайга аан бастакытын көтөн кэллэ. Экспонаттары көһөрөргө бэйэтэ уустуктардаах: барытын үчүгэйдик суулаан, айан устун Росгвардия харабыллаах көрө-харайа сылдьыахтаахпыт.

Бу чаһы көмөтүнэн билигин да бириэмэни быһаарыахха сөп. Ол үрдүнэн чаһы ураты механизмын көмөтүнэн билигин ханнык баҕарар дойдуга, куоракка билиҥҥи бириэмэтин суоттаан билиэххэ сөп.

Юлия Кравцова, СӨ НХТ научнай уонна выставочнай үлэ генеральнай дириэктэрин солбуйааччы

—Эрмитаж испиисэлиистэрэ Саха сирин түмэллэрин үлэһиттэригэр реставрация, экспонаттары харыстыыр уонна түмэл куттала суох буолуутун туһунан семинар ыытыахтара. Ону таһынан косторезнай   ускуустуба боппуруостара сырдатыллыахтара. Биһиэхэ элбэх сайаапка киирдэ, араас улуустартан кыттааччылар кэлиэхтэрэ.

Чаһыттан ураты быыстапкаҕа Петр I, Анна Иоанновна, Елизавета II, Екатерина II мэтириэттэрэ уонна Иоганн Георг де Майра “Вид на Дворцовую набережную со Стрелки Васильевского острова в Санкт-Петербурге” хартыыната Эрмитажтан Дьокуускайга кэлэн дьон биһирэбилин ылыахтара. Ону таһынан НХТ бэйэтин кэллиэксийэтиттэн XVIII-XIX үйэтээҕи Санкт-Петербург графическай пейзажтарын көрдөрүөҕэ.