Дьокуускайга экскурсиялары тэрийэр бюро арыллыан сөп

Куорат баһылыгын иһинэн Урбааҥҥа уонна туризмҥа координационнай сэбиэт тохсунньу 25 күнүнээҕи уочараттаах мунньаҕа баһылык Евгений Григорьев салалтатынан буолаары турар «Азия оҕолоро» Норуоттар икки ардыларынааҕы спортивнай оонньуулар чэрчилэринэн туризм боппуруостарын дьүүллэстэ.

Координационнай сэбиэт маны сэргэ куораты тупсарыы, дьиэлэри киэргэтии, атыыны-эргиэни, уопсастыбаннай аһылыгы тэрийии тула мунньахтаата.

Киин куорат Урбааҥҥа, потребительскэй ырыынакка уонна туризмы сайыннарыыга департаменын начаалынньыгын эбээһинэһин толорооччу Кирилл Лазарев Оонньуулар кэмнэригэр эргиэн уонна уопсастыбаннай аһылык туочукаларын тэрийэр миэстэлэри аатталаата.

Сүрүн болҕомто Оонньуулар кыттыылаахтарыгар уонна ыалдьыттарга анал экскурсиялары тэрийиигэ уурулунна. Ол курдук, бүгүҥҥү күҥҥэ сатыы уонна оптуобуһунан сылдьар маршруттар бырайыактара оҥоһулла сылдьарын, бу маршруттары Оонньуулар да кэннилэриттэн салгыы үлэлэтэр былаан баарын иһитиннэрдилэр.

Ону сэргэ куоракка экскурсияларынан дьарыктанар анал бюрону тэрийэр, Кырдьаҕас куорат оройуонун туристар тоҕуоруһар кииннэригэр кубулутар үлэни ыытар, «Азия оҕолоро» урукку сыллардааҕы кыайыылаахтарын улнна призердарын туһунан быыстапканы тэрийэр наадатын туһунан этилиннэ.