Дьокуускайга Бүтүн Арассыыйатааҕы нэһилиэнньэ биэрэпиһин 104 стационарнай учаастага арыллыаҕа

Бүтүн Арассыыйатааҕы нэһилиэнньэ биэрэпиһигэр бэлэмнэнии чэрчитинэн куорат баһылыга Евгений Григорьев, Уокуруктааҕы дьаһалта территориялары кытта үлэҕэ Департаменын начаалынньыгын солбуйааччы Светлана Кармадонова, судаарыстыбаннай статистика Федеральнай сулууспатын Территориальнай уорганын салайааччыта Ирина Гаевая кыттыылаах оробуочай мунньах ыытылынна. 
Билиҥҥи туругунан дьиэ арендатын 69 дуогабара түһэрсиллибит. Итини сэргэ биэрэпис учаастактара төлөбүрэ суох «Якутскэнергосбыт» пууннарыгар уонна «Почты России» салааларыгар үлэлиэхтэрэ, биэрэпис персоналын хааччыйарга тырааныспар арендатын уонна сибээс өҥөлөрүн дуогабардара түһэрсиллэр. 
«Алтынньы 4 күнүгэр диэри 104 стационарнай биэрэпис учаастактарын арыйыахпыт, онно контролердар үлэлиэхтэрэ. Оттон алтынньы 15 күнүттэн биэрэписчиктэр үлэлэрин саҕалыахтара», – диэтэ  Светлана Кармадонова.
Бүгүҥҥү күҥҥэ биэрэпис персоналын үлэҕэ ылыы салҕанар, билигин 54 контролер (50%) уонна 146 биэрэписчик киирбит. Былаастар куорат олохтоохторун биэрэписчиктэр кэккэлэрин хаҥаталларыгар уонна ураты суолталаах тэрээһиҥҥэ кытталларыгар ыҥырар. Биэрэпис түмүгүнэн тупсарыы, оскуолалары уонна социальнай эбийиэктэри тутуу боппуруостара быһаарыллаллар. 
Судаарыстыбаннай статистика Федеральнай сулууспатын Территориальнай уорганын салайааччыта Ирина Гаевая нэһилиэнньэ биэрэпиһин сүрүн соруктарын, нэһилиэнньэ 100% хабыллыахтааҕын туһунан санатта. 
«Коронавирус пандемиятын кэмигэр, ону сэргэ биэрэпис учаастактарын ноҕуруускаларын аҕыйатар курдук, нэһилиэнньэ биэрэпиһи Судаарыстыбаннай өҥө порталын нөҥүө ааһарыгар ыҥырабыт», – диэн бэлиэтээтэ Ирина Гаевая.
2021 сыл от ыйын 1-гы күнүнээҕи туругунан, Дьокуускай куорат территориятыгар 148 тыһ. 307 дьиэҕэ 350 тыһ. 507 киһи олорор. 
Санатан эттэххэ, нэһилиэнньэ биэрэпиһин сүрүн түһүмэҕэ 2021 сыл алтынньы 15 күнүттэн сэтинньи 14 күнүгэр диэри ыытыллар. Гражданнар биэрэпиһи дьиэлэригэр, биэрэписчиги кэтэһэн суруйтарыахтарын, эбэтэр биэрэпис учаастагар кэлэн уонна Судаарыстыбаннай өҥө порталын нөҥүө биэрэпиһи ааһыахтарын сөп.