Дьокуускайга аспааллааһын түмүктэнэн эрэр

Бу нэдиэлэҕэ Дьокуускайга аспааллааһын үлэтэ түмүктэнэрин туһунан куорат уопсай планеркатыгар «Главстрой» МХТ дириэктэрэ Алексей Варламов иһитиннэрдэ.

Билиҥҥи туругунан суол үлэтин быйылгы сыллааҕы былаана 98,5% туолла.

«Бүгүҥҥү күҥҥэ биһиэхэ биир эрэ эбийиэк хаалла – Ильменскэй уулуссата. Итиннэ 600 миэтэрэ аспаал иккис дьапталҕатын уурарбыт хаалла», — диэн отчуоттаата Алексей Варламов.

Куорат баһылыга Евгений Григорьев үлэ булгуччу техническэй уонна уопсастыбаннай хонтуруоллаах ыытыллыахтаах диэн бэлиэтээтэ.

«Бэдэрээтчит аспаалы ууруутун саҕалаатаҕына, үлэ технологията тутуһулларын, камеранан кэтэбилгэ тиийэ, хонтуруоллуургутугар көрдөһөбүн. Информацияны киэҥник тарҕатар сириэстибэлэри кытта үлэлэһиҥ, куорат олохтоохторо үлэ хайдах барарын көрүөхтээхтэр», — диэтэ баһылык.