Дьокуускайга архитектура бастакы бэстибээлэ ыытыллар

Бэстибээл «ЭЙГЭ-2024» архитектура уонна дизайн бириэмийэтин туттарыытын иннинээҕи бастакы тэрээһининэн буолар.

«Быйыл архитектура бэстибээлин саҥа форматынан ыытарга быһаарынныбыт, бастакы түһүмэҕэ балаҕан 14 күнүттэн Казань куоракка саҕаланна. Онно Татарстан Өрөспүүбүлүкэтин Куораттары сайыннарар института Саха сирин оройуоннарын исписэлиистэригэр анаан үөрэх бырагырааматын тэрийдэ. Үөрэххэ Мэҥэ Хаҥалас уонна Бүлүү улуустарыттан, Дьокуускай, Мииринэй, Нерюнгри куораттартан уонна Жатай бөһүөлэгиттэн хамаандалар кытыннылар. Кэлэр сылга кинилэр бары тупсаран оҥоруу бөдөҥ эбийиэктэрин олоххо киллэриэхтэрэ. Итинник практикумнар бырайыактыыр түһүмэхтэн саҕалаан хаачыстыбалаах үлэни ыытар сыалы туруорарга көмөлөһөллөр», - диэтэ СӨ баһылыгын иһинэн үлэлиир Архитектура уонна куораты тутуу управлениетын салайааччыта Любовь Папок.

Кини бэлиэтээбитинэн, бэстибээлгэ архитектордар, дизайнердар, сакаасчыттар, бэдэрээтчиттэр, оҥорон таһаарааччылар, муниципальнай тэриллиилэр баһылыктара, экспертэр уонна куорат көхтөөх олохтоохторо кыттыахтара.

«Итини сэргэ 2023 – 2024 сылларга араас хайысхаларынан көрсүһүүлэри уонна үөрэтэр бырагыраамалары тэрийэри былаанныыбыт, ол түмүгүнэн сүрүн тэрээһин – «ЭЙГЭ-2024» архитектура уонна дизайн бириэмийэтин туттарыыта буолуоҕа», - диэн бэлиэтээтэ Любовь Папок.