Дьокуускайга анал дьайыы кыттыылаахтарын көрүстүлэр

Бэс ыйын 2 күнүгэр киин куорат Гагаринскай уокуругун салайааччыта Евгений Сидоренко уонна Норуот фронун регионнааҕы салаатын хос бэрэссэдээтэлэ Дмитрий Паньков Дьокуускай аэропордугар анал байыаннай дьайыыттан дойдуларыгар уоппускаҕа кэлбит байыастары көрүстүлэр уонна Ил Дархан Айсен Николаев аатыттан саха быһахтарын туттардылар.
Байыастар ортолоругар Дьокуускай куораттан, Чурапчы, Уус Алдан, Өлүөхүмэ, Хаҥалас улуустарыттан ыҥырыллыбыттар, ол иһигэр куорат Гагаринскай уокуругуттан уоллаах аҕа бааллар.
Евгений Сидоренко байыастарга уонна салайар уокуругуттан байыаннай дьайыы зонатыгар сылдьааччыларга туһаайан: «Эһиги үгүстэргэ холобур буоллугут, маннык хорсун санаалаах дьиэ кэргэттэринэн биһиги киэн туттабыт. Чугас дьоҥҥут этэҥҥэ буоллуннар, доруобай буолуҥ, Кыайыы биһиги диэки буолуоҕа!» — диэн эттэ. 

Норуот фронун регионнааҕы салаатын хос бэрэссэдээтэлэ Дмитрий Паньков соторутааҕыта Дьокуускайга «Защитники Отечества» судаарыстыбаннай пуонда салаата арыллыбытын, онно кэлэн кыһалҕалаах боппуруостарын быһаартарыахтарын сөбүн санатта, диэн иһитиннэрэр сонуннары киэҥник тарҕатар тиһиктэргэ СИА.