Дьокуускайга аан дойдутааҕы йога күнүн бэлиэтээтилэр

Өксөкүлээх Өлөксөй аатынан Норуоттар доҕордоһууларын дьиэтигэр 10-с аан дойдутааҕы йога күнүн бэлиэтээтилэр. 
Тэрээһин кыттыылаахтарын СӨ Уһук Илин федеральнай уокуругар бастайааннай бэрэстэбиитэлэ Ким Борисов, СӨ тас сибээскэ уонна норуоттар дьыалаларыгар миниистирэ Гаврил Кириллин, Саха сиригэр Индия култууратын киинин бэрэсидьиэнэ Кришан Кумар Гоял уонна «Ганг» Индия табаарын маҕаһыынын салайааччыта Гоял Радха эҕэрдэлээтилэр.

Бу күн мустубут дьоҥҥо «Джива-Шакти» йога оскуолатын уһуйааччылара маастар-кылаас көрдөрдүлэр. Исписэлиистэр этэллэринэн, йога диэн аҥаардас эрчиллиилэр эрэ буолбакка, эти-сиини өйү-санааны кытта дьүөрэлиир дириҥ силистээх, былыргы наука. Йога биир сүрүн уратытынан ханнык баҕар саастаах киһиэхэ барсара буолар.
Аан дойдутааҕы йога күнэ ХНТ Генеральнай Ассамблеятынан 2014 сылга олохтоммута уонна сыл аайы бэс ыйын 21 күнүгэр бэлиэтэнэр, диэн иһитиннэрэр Норуоттар доҕордоһууларын дьиэтин пресс-сулууспата.

Айталина Аргунова хаартыскаҕа түһэриитэ