Дьокуускайга аҕалар бастакы слеттара ыытылынна
Слету Дьокуускай куорат Аҕаларын сэбиэтэ Олохтоох дьаһалта Уопсастыбаннай сибээстэргэ уонна ыччат бэлиитикэтигэр управлениетын көмөтүнэн тэрийэн ыытта. Тэрээһиҥҥэ киин куорат оскуолаларын төрөппүт кэмитиэттэриттэн 80 аҕа кытынна.
Эҕэрдэ тылы Ил Түмэн дьиэ кэргэн уонна оҕо саас дьыалаларыгар сис кэмитиэтин бэрэссэдээтэлэ Алена Атласова, Дьокуускай куораттааҕы Дуума Бэрэссэдээтэлин бастакы солбуйааччы Евдокия Евсикова, «СӨ Норуоттарын ассамблеята» уопсастыбаннай хамсааһын бэрэссэдээтэлэ Александр Подголов, «СӨ Аҕаларын лигата» уопсастыбаннай тэрилтэ бэрэссэдээтэлин солбуйааччы Албан Стрекаловскай, Дьокуускай куорат Уопсастыбаннай палаататын бэрэссэдээтэлэ Матвей Лыткин эттилэр.
Дьокуускай куорат Аҕаларын сэбиэтин чилиэннэрэ уопсастыбаннай үлэҕэ уопуттарын үллэһиннилэр. Саха гимназия Аҕаларын сэбиэтин үлэтин туһунан бэрэссэдээтэл Егор Жерготов кэпсээтэ. Аҕалар уонна уолаттар күрэхтэрин кыайыылааҕа Александр Винокуров Аҕа күрэҕин туһунан сырдатта. Глобальнай үөрэхтээһин киинин муусукаҕа учуутала Андрей Петров оҕолору айымньы нөҥүө иитии, 34-с №-дээх коррекционнай оскуола-интэринээт учуутала Юрий Ощепков уустук балаһыанньаҕа түбэспит доруобуйаларыгар хааччахтаах оҕолору спорт көмөтүнэн иитии туһунан кэпсээтилэр. Иитийэх оҕолордоох Петр Тарабукин сквердэри тутууга уопутун үллэһиннэ.
Слет иккис чааһыгар кыттааччылар бырайыактыыр бөлөхтөргө үлэлээтилэр, Дьокуускай куорат Аҕаларын сэбиэтин үлэтин былааныгар киллэрэр идиэйэлэрин дьүүллэстилэр.
Сонуннар
Ордук ааҕаллар
