Дьокуускайдааҕы медколледж филиала аһылынна

Исписэлиистэри «лечебное дело» уонна «сестринское дело» хайысхаларынан үөрэтиэхтэрэ. Биэлсэрдэри уонна медсиэстэрэлэри бэлэмнээһин Чурапчы оройуонун киин балыыһатын уонна Агротехнологическэй колледж базаларыгар бэлэмниэхтэрэ. Филиалы тэрийии – Дьокуускайдааҕы медколледж уонна Чурапчы улууһун дьаһалтатын бииргэ үлэлээһиннэрин түмүгэ.

Үөрэх салаата 30 миэстэҕэ оросчуоттаммыт. Устудьуоннар толору бырагырааманы аастахтарына орто анал профессиональнай үөрэхтээһин туһунан диплому ылыахтара. Эдэр исписэлиистэри олохтоох быраастар үөрэтиэхтэрэ. «Медколледж салаатын аһыллыыта доруобуйа харыстабылын бастакы сүһүөҕүн саҥардыы бырагырааматынан медицинскэй каадырдары бэлэмнээһиҥҥэ төһүү күүһүнэн буолуоҕа. Үөрэх кыһата, муниципальнай  тэриллии уонна улуус балыыһата бииргэ үлэлээһиннэрин түмүгэр оройуоҥҥа наһаа наадалаах исписэлиистэр тахсыахтара диэн үөрэбит», - диэн бэлиэтээтэ Доруобуйа харыстабылын миниистирэ Лена Афанасьева.

Чурапчы оройуоннааҕы балыыһатын кылаабынай бырааһа Артем Ксенофонтов эппитинэн, салааны арыйыы дьоһун суолталаах түбэлтэ уонна исписэлиистэр, үөрэхтэрин бүтэрдилэр даҕаны, оройуоннааҕы балыыһа араас салааларыгар үлэҕэ киириэхтэрэ.