Дьокуускай VIII-с сайыҥҥы «Азия оҕолоругар» бэлэмнэнэр

2024 сыл бэс ыйын 26 - от ыйын 6 күннэригэр былааннанар VIII-с сайыҥҥы «Азия оҕолоро» норуоттар икки ардыларынааҕы спортивнай оонньууларга бэлэмнэнии Дьокуускай куоракка быйыл сайыҥҥыттан саҕаланна.
Ол курдук, куорат баһылыгын хаһаайыстыба боппуруостарыгар солбуйааччы Егор Кардашевскай Оонньуулары тэрийэр кэмитиэт мунньаҕар иһитиннэрбитинэн, Гагаринскай, Центральнай, Октябрьскай, Промышленнай уонна Сайсары уокуруктарыгар 15 хаарбах дьиэ көтүрүллэн, олохтоохтор саҥа дьиэнэн хааччыллыахтаахтар.
Маны сэргэ 16 спорт эбийиэгэр, ол иһигэр «Туймаада» стадиоҥҥа өрөмүөн ыытыллар. Уулусса-суол ситимин өрөмүөнүгэр, ууну ыытар ситимнэргэ, тупсарыы үлэтигэр эмиэ болҕомто ууруллар. Дзержинскэй, Ойуунускай, Лермонтов, Дежнев, Кулаковскай уулуссаларыгар, итиэннэ спорт эбийиэктэригэр киирэр суолларга, тротуардарга өрөмүөн барар.
Өрөмүөннэнэр уопсастыбаннай туоналар, сквердэр, пааматынньыктар испииһэктэригэр 13 болуоссат уонна 7 пааматынньык киирэн турар.
Санатар буоллахха, Азия оҕолорун спортивнай бырааһынньыгар 35-40 дойдуттан 3 тыһыынчаттан тахса киһи кэлиэҕэ, диэн иһитиннэрэр Олохтоох дьаһалта пресс-сулууспата.