Дьокуускай уонна Харбин бииргэ үлэлэһэр буоллулар

Бу күннэргэ Кытай Норуодунай Өрөспүүбүлүкэтигэр СӨ Ил Дархана Айсен Николаев салайааччылаах официальнай делегация үлэлиир. Алтынньы 17 күнүгэр Дьокуускай куорат баһылыга Евгений Григорьев Харбин куорат баһылыга  Чжан Цисян кытта көрүстэ диэн Олохтоох дьаһалта пресс-сулууспата иһитиннэрдэ.

Көрсүһүүгэ Дьокуускай уонна Харбин бииргэ үлэлэһиилэрин сайыннарыыны дьүүллэстилэр. Бииргэ үлэлэһии 2005 сыллаахха саҕалыммыта, онтон 2007 сыллаахха бырааттыы сыһыаны олохтуур Сөбүлэҥ түһэрсиллибитэ.

Көрсүһүү чэрчитинэн өрүттэр 2023-2025 сылларга эргиэн-экономика, куорат хаһаайыстыбатын, үөрэҕирии, култуура эйгэлэригэр уо.д.а бииргэ үлэлээһин туһунан Былааҥҥа илии баттастылар. Итиэннэ Дьокуускайдааҕы «Муниципальнай архыып» МХТ уонна Харбин куорат архыыба бииргэ үлэлээһин туһунан Сөбүлэҥи түһэристилэр.