Дьокуускай сааскы халаан уутугар бэлэмнэнэр

Гидрометеорология управлениета иһитиннэрэринэн, Дьокуускайга Өлүөнэ мууһа ыам ыйын 12-14 күннэригэр хамсыахтаах.

Сааскы халаан уутугар бэлэмнэнии былаана өссө  олунньу 19 күнүгэр торумнаммыта. Кулун тутар 20 күнүттэн биэдэмистибэлэр икки ардыларынааҕы анал хамыыһыйа үлэлиир. Ууга барыан сөптөөх сирдэртэн нэһилиэнньэни көһөрүү, суолу-ииһи бэрэбиэркэлээһин былаанын Гражданскай оборона, ыксаллаах быһыыга-майгыга нэһилиэнньэ харыстабылын управлениета оҥорор.

Дьиэ-уот департамена иһитиннэрэринэн, ууга быладьаныан сөптөөх сиргэ 35 инфраструктура эбийиэгэ, 262 дьиэ, ол дьиэлэргэ олорор 1210 дьон (ол иһигэр 368 оҕо) бааллар. Бу дьон, халаан уута тахсар түгэнигэр, быстах болдьоххо олорор дьиэнэн хааччыллыахтара.

Куорат таһынааҕы нэһилиэктэргэ сүөһүнү, сылгыны күрэтиэхтэрэ. Хатаска уу кэлэр түгэнигэр 81 төбө хороҕор муостаах нэһилиэктэн 3 км ыраах сиргэ, 18 сылгы 4 км ыраах Ой-Бэс диэн сиргэ көһөрүллүөхтэрэ. Тулагы-Киллэмҥэ 604 төбө сүөһүнү, 866 сылгыны Кангаласс нэһилиэгин үрдүк сиригэр куоттарыахтара. Табаҕаҕа сүөһүлэрин муус хамсыан иннинэ үрдүк сиргэ таһаарар былааннаахтар.

Муус устар 23 күнүгэр өрүс мууһун кэбирэтии үлэтэ түмүктэннэ. Дьокуускай таһынан 13 км муус эрбэннэ, 47 га муус хараардылынна.

Дьокуускай дьаһалтата сааскы халааҥҥа бэлэмнэнэн, 7 мөл. солк, 126 л. уматыгы бэлэмнээтэ. Бу үп барыта сааскы халааны аһардыыга уонна баһаары утары тэрээһиннэргэ туттуллуоҕа.