Дьокуускай оттук сезонугар бэлэмин туһунан пааспары ылла

Докумуон ититиинэн хааччыйар тэрилтэлэр, ситимнэр, элбэх кыбартыыралаах дьиэлэр кыһыҥҥа толору бэлэмнэрин туһунан туоһулуур.  Ол туһунан СӨ Ростехнадзорун Ленскэйдээҕи управлениета бигэргэттэ. Хамыыһыйа бэрэбиэркэтин түмүгүнэн пааспары биэрэр быһаарыы ылыннылар.

«Куорат бэлэмин туһунан пааспары болдьоҕор ылла, ити ититиинэн хааччыйар куорат систиэмэтэ кыһыҥҥы тымныыларга харгыһа суох үлэтин мэктиэлиир», – диэн бэлиэтээтэ баһылыгы куорат хаһаайыстыбатын боппуруостарыгар солбуйааччы Егор Кардашевскай.

Дьокуускай куоракка 2938 элбэх кыбартыыралаах дьиэ баар, итинтэн 1271 дьиэтэ пааспарданыахтаах. Оттук сезонугар бэлэм туһунан пааспар 1249 дьиэҕэ бэриллинэ (98%). Оттон 22 элбэх кыбартыыралаах дьиэҕэ хапытаалынай өрөмүөн ыытылларынан сибээстээн, Арассыыйа Энергетикаҕа министиэристибэтин 2013 сыл кулун тутар 12 күнүнээҕи 103 №-дээх бирикээһигэр олоҕуран, бэлэм туһунан аакта туттарылынна. Бэлэм туһунан аакта 2938 элбэх кыбартыыралаах дьиэҕэ барыларыгар бэрилиннэ (100%).

Итини сэргэ бэрэбиэркэни 307 социальнай тэрилтэ, ол иһигэр оҕо уһуйааннара, оскуолалар, эбии үөрэхтээһин эбийиэктэрэ уо.д.а. аастылар.

Киин куорат территориятыгар 76 хочуолунай баар, ититии эбийиэктэрэ бары 100 % үлэлииллэр. Оттук сезонугар бэлэмнэрин туһунан пааспары 17 ресурсанан хааччыйар тэрилтэ бары ыллылар.