Дьокуускай куораттааҕы Дуума уочараттаах 39-с сессията ыытылынна
Ол иһигэр Оскуола иннинээҕи, уопсай орто уонна эбии үөрэхтээһин эйгэтигэр боломуочуйалар тустарынан балаһыанньа, Хонтуруоллуур-суоттуур палаата бэрэссэдээтэлин анааһын, куорат уулуссарыгар ааты иҥэрии боппуруостара бааллар.
Сессияҕа дьокутааттар Куорат уокуругун устаабыгар, федеральнай сокуоҥҥа олоҕуран, уларытыылары киллэриини, итиэннэ 2022 уонна 2023-2024 сылларга былааннаммыт куорат бүддьүөтүн быһаарыыларыгар уларытыылары бигэргэттилэр.
Үп департаменын начаалынньыга Ольга Максимова информациятынан, 2022 сыллааҕы куорат бүддьүөтүн чуолкайдааһын 688,2 мөлүйүөн солкуобай улаатыннаран оҥоһуллар. Чуолкайдаммыт былаан дохуот өттүнэн суумата – 26,9 млрд солкуобай. Бүддьүөт ороскуота 688,2 мөлүйүөн солкуобайынан улаатта, былааннаммыт суума – 27,7 млрд солкуобай.
2022 сылга эбии үп үөрэҕирии сайдыытыгар (+ 717,3 мөл), муниципальнай бырагыраамаларга – «“Дьокуускай куорат” куорат уокуругун култуурата 2020-2024 сылларга» (+ 95,9 мөл), «Баай-дуол уонна сир комплексын сайдыыта 2020-2024 сылларга» (+59,8 мөл), «Ыччат. Дьиэ кэргэн. Спорт. Доруобай куорат 2020-2024 сылларга» (+54,4 мөл), «Куорат уокуругун нэһилиэнньэтин дьиэнэн хааччыйыы 2020-2024 сылларга» (+ 34,6 мөл), «Куорат уокуругун агропояһын сайыннарыы 2020-2024 сылларга» (+34,3 мөл), «Куорат уокуругун ОДьКХ үлэлэтии уонна сайыннарыы 2020-2024 сылларга» уо.д.а. хайысхаларга көрүлүннэ.
Итини сэргэ, дьокутааттар Куорат уокуругун бүддьүөтүн туһунан балаһыанньаҕа, территориятын тупсарыы, итиэннэ сирин туһаныы уонна тутууну ыытыы быраабылаларыгар уларытыылары киллэриини бигэргэттилэр.
Итини таһынан, «Саҥа уулуссаларга уонна переулоктарга ааты иҥэрии туһунан» уураахха уларытыы киллэрилиннэ, Евгений Евтушенко, Степан Васильев ааттарынан уулуссалар, Сергей Васильев-Борогонскай аатынан переулок баар буоллулар.
Сессияҕа Оскуола иннинээҕи, уопсай орто уонна эбии үөрэхтээһин эйгэтигэр боломуочуйалар, муниципальнай үөрэҕирии тэрилтэлэрин үбүлээһин тустарынан балаһыанньа бигэргэтилиннэ, куорат уокуругун Хонтуруоллуур-суоттуур палаататын бэрэссэдээтэлэ ананна. Куоластааһын түмүгүнэн Виктор Ушницкай кандидатурата бигэргэтилиннэ.
Дуума дьокутааттара Иван Анисимовка, Семен Жирковка, Мария Жорницкаяҕа, Иван Кычкиҥҥа, Александра Черниноваҕа, Игорь Черскэйгэ мемориальнай дуосканы туруорар туһунан быһаарыыны ылыннылар. Итини таһынан «Дьокуускай куорат бочуоттаах олохтооҕо» ааты иҥэрии, «Дьокуускай иннигэр үтүөлэрин иһин» бэлиэнэн наҕараадалааһын кандидатураларын сөпсөстүлэр.
Сонуннар
Ордук ааҕаллар
