Дьокуускай куорат Уопсастыбаннай палаатата аҥаардас аҕаларга социальнай көмүскэл тула мунньахтаата

Кулун тутар 27 күнүгэр Матвей Лыткин бэрэссэдээтэллээх киин куорат Уопсастыбаннай палаатата «Аҥаардас аҕаларга уонна кинилэр дьиэ кэргэттэригэр социальнай көмүскэл уонна өйөбүл соруктара» төгүрүк остуолу тэрийэн ыытта.

Төгүрүк остуолга Куорат дууматын бэрэссэдээтэлин бастакы солбуйааччы, куорат Киин уокуругун дьокутаата Евдокия Евсикова, Дьокуускай куорат дьахталларын лиигатын бэрэссэдээтэлэ Татьяна Егорова, Үлэ уонна социадьнай сайдыы министиэристибэтин иһинэн Дьокуускай куораттааҕы Социальнай көмүскэл управлениетын салайааччыта Марта Жиркова, Дьокуускай куораттааҕы психолого-медико-социальнай арыаллааһын киинин дириэктэрэ Любовь Колодкина уонна «Аҥаардас аҕалар» Өрөспүүбүлүкэтээҕи уопсастыбаннай тэрилтэ бэрэссэдээтэлэ Иннокентий Спиридонов кыттыыны ыллылар.

Социальнай көмүскэл управлениетын салайааччыта Марта Жиркова бэлиэтээбитинэн, «аҥаардас аҕа» уонна «аҥаардас ийэ» диэн статус суох, тиийинэн олоруу муҥутуур алын кээмэйиттэн намыһах дохуоттаах ыалларга социальнай өйөбүл диэн баар. Судаарыстыба маннык ыалларга социальнай хантараак быһыытынан өйөбүлү оҥорор.

Ол курдук, кэтэх хаһаайыстыбаны тэринниигэ, урбаанынан дьарыктаныыга эбэтэр олох очурун туоруурга диэн көмөлөр оҥоһуллаллар.

Олорор дьиэ усулуобуйатын тупсарыыга социальнай төлөбүр 2010 сыл тохсунньу 1 күнүн кэнниттэн биир кэмҥэ үс уонна онтон элбэх оҕолоох дьиэ кэргэттэргэ оҥоһуллар. 5 уонна онтон элбэх сокуоннай саастарын ситэ илик оҕолоох ыалларга олорор дьиэни атыылаһарга эбэтэр туттарга, олохтоох бэйэни салайыныы уорганнарыгар учуокка турар буоллахтарына, биир кэмнээх социальнай төлөбүр оҥоһуллар.

СӨ Ил Дарханын «Дьадайыыны утары охсуһуу миэрэлэрин туһунан» ыйааҕынан регион пилотнай бырайыакка киирбит. Ол курдук, олох очуругар оҕустарбыт өрөспүүбүлүкэ 190 ыалыгар бу бырагырааманан көмө оҥоһуллар. Туһааннаах министиэристибэлэр уонна ведомстволар бу ыалга уустук балаһыанньаттан тахсарга көмөлөһөллөр. Бүгүҥҥү күҥҥэ Дьокуускай куорат бары уокуруктара бу бырагыраамаҕа кыттыан сөптөөх ыаллар испииһэктэрин хомуйаллар.

Мунньах түмүгүнэн өрөспүүбүлүкэ аҥаардас аҕаларын учуотун оҥорорго уонна онтон төһө оҕо лааҕырга наадыйарын быһаарарга сөбүлэстилэр. Аҥаардас аҕаларга маны сэргэ психологическай көмөнү оҥорор тэрилтэлэр контактарын биэрдилэр.

Уопсастыбаннай палаата аҥаардас аҕаларга социальнай өйөбүл боппуруоһун хонтуруолга ылла, диэн иһитиннэрэр Олохтоох дьаһалта пресс-сулууспата.