Дьокуускай куорат сиригэр-уотугар баһаартан сэрэхтээх буолуу кэккэ ирдэбиллэрэ

Олохтоох дьаһалта тыа хаһаайыстыбатыгар управлениета Дьокуускай куорат сиригэр-уотугар – тыа хаһаайыстыбатын аналынан туттуллар бары сиргэ-уокка, саппаас сирдэргэ, нэһилиэнньэлээх пууннарга – хаппыт оту, маһы, бөх бары көрүҥүн уматар, өртөөһүн үлэтин ыытар кытаанахтык бобулларын санатар. 
Ол курдук, Дьокуускай куорат Олохтоох дьаһалтатын тыа хаһаайыстыбатыгар управлениета таһаарбыт бирикээһинэн, куорат таһынааҕы нэһилиэктэр дьаһалталарын, тыа хаһаайыстыбатын тэрилтэлэрин, бааһынай, фермерскэй хаһаайыстыбалар салайааччылара ыһыы, хомуур, оттооһун чэрчитинэн баһаартан сэрэхтээх буолуу боппуруостарын тус хонтуруолларыгар ылаллар. 
«Дьокуускай куорат» Куорат уокуругун территориятыгар киирэр тыа хаһаайыстыбатын аналынан туттуллар бары сирдэргэ сэтиэнэҕи уматар, өртөөһүнү ыытар кытаанахтык бобуллар. 
Салайааччылар ойууртан, хонуу усулуобуйатыгар ньиэп бородуукталарын харайар уонна сапараапкалыыр пууннартан, нэһилиэнньэлээх пууннартан чугас бары бас билэр, эппиэттээх сирдэрин-уоттарын хаппыт, кураанах оттон-мастан, умайар бөхтөн ыраастааһыны хааччыйыахтаахтар. Маны таһынан, уот турар түгэнигэр дьоҥҥо куттал суоһаабатын хааччыйары мэһэйдиир баһаартан сэрэхтээх буолуу ирдэбиллэригэр сөп түбэспэт дьиэлэри, тутуулары үлэҕэ-хамнаска о.д.а. туһаныы бобуллар, диэн иһитиннэрэр Олохтоох дьаһалта пресс-сулууспата.