Дьокуускай куорат Дууматын 200 сыллаах үбүлүөйэ бэлиэтэннэ

Тэрээһин «Дьокуускай куорат бэрэстэбиитэллээх уорганын историята» театрализованнай көрдөрүүттэн саҕаланна, итиэннэ Дуума дьокутааттарын уонна үлэһиттэрин хора Дьокуускай гимнин толордулар.

Дьокуускай куораттааҕы Дуума историята 1822 сылга Арассыыйа биллиилээх реформатора Михаил Сперанскай «Учреждение для управления сибирских губерний» дьаһалы бигэргэппититтэн саҕаланар. Итиннэ олоҕуран Дьокуускай орто куораттар ахсааннарыгар киирбитэ, куорат ратушата тэриллэр буолбута. Хайа күн тэриллиэҕиттэн ыла Дьокуускай куорат Дуумата норуокка саамай чугас, олох тупсуутун уонна киин куорат сайдыытын туһугар үлэлиир былаас уорганынан буолар.

Үөрүүлээх тэрээһиҥҥэ киин куорат бэрэстэбиитэллээх уорганын  салайааччылара уонна дьокутааттара, өрөспүүбүлүкэ уонна куорат салалтата, Саха сирин уонна Арассыыйа муниципальнай тэриллиилэрин уонна бэрэстэбиитэллээх уорганнарын салайааччылара, уопсастыбаннас кытыннылар.

«Биһиги, Дьокуускай куораттааҕы Дуума дьокутааттара, былаас систиэмэтин үлэтин таһымын үрдэтэргэ олохтоох бэйэни салайыныыга сүрүн оруол ананарын өйдүүбүт. Дьокуускай куорат сайдыыта бигэ туруктаах, нэһилиэнньэ олоҕун усулуобуйата тупсарын, куорат эйгэтэ олорорго бары өттүнэн табыгастаах буоларын туһугар туох баар күүспүтүн-уохпутун ууруохпут», - диэтэ Дьокуускай куорат Дууматын Бэрэссэдээтэлэ, РФ Бэрэсидьиэнин иһинэн үлэлиир Олохтоох салайыныы сэбиэтин чилиэнэ Альберт Семенов.

Кини кэллиэгэлэригэр, Дьокуускай куорат Дууматын бары ыҥырыылаах мунньахтарын дьокуутааттарыгар, муниципальнай сулууспалаахтарга уонна бэтэрээннэргэ үтүө суобастаах үлэлэрин, олохтоох салайыныы сайдыытыгар кылааттарын, куораттарыгар тапталларын иһин истиҥ махталын биллэрдэ.  

«Дьокуускай куораттааҕы Дуума дойду таһымыгар иһиллэр куоластаах, Арассыыйа муниципальнай тэриллээһиннэрин ортотугар улахан аптарытыатынан туһанар. Итиннэ, биллэн турар, дьокутааттар улахан өҥөлөрө баар, бүгүн кинилэргэ дириҥ махталбытын уонна ытыктабылбытын биллэрэбит», - диэтэ эҕэрдэ тылыгар Саха Өрөспүүбүлүкэтин Ил Дархана Айсен Николаев.

Кини бүгүҥҥү күҥҥэ Дьокуускай куорат иннигэр саҥа соруктар туралларын уонна сүрүн сыал – 2032 сылга өрөспүүбүлүкэ киин куоратын 400 сылын дьоһуннук көрсүү буоларын бэлиэтээтэ.  Дьокуускай Уһук Илиҥҥэ уонна Арассыыйаҕа экономическай сайдыыга, саҥа технологиялары киллэриигэ, дьон олоҕун хаачыстыбатын тупсарыыга холобур буолар, инники кэккэҕэ сылдьар регион киинэ буолуохтааҕа этилиннэ.

 Эҕэрдэ тылы Ил Түмэн Судаарыстыбаннай мунньах Бэрэссэдээтэлэ Алексей Еремеев, СӨ бырабыыталыстыбатын Бэрэссэдээтэлин бастакы солбуйааччы Кирилл Бычков, куорат баһылыга Евгений Григорьев эттилэр. Үөрүүлээх мунньахха «Дьокуускай куорат бэрэстэбиитэллээх уорганын 200 сыла» үбүлүөйдээх мэтээллэри уонна наҕараадалары туттардылар.