Дьокуускай куорат бэтэрээннэрэ Үлэ сылынан ыһыах ыстылар

От-мас көҕөрөн, сибэкки арааһа хонууну киэргэтэн, кэҕэ этэн чоргуйан, алардарбыт-тыаларбыт көтөр-сүүтэр ырыатынан туолан, дьэ, саха эрэ дууһата ыллыыр, үөрэр-көтөр кэтэһиилээх самаан сайыммыт кэллэ.

Бэс ыйын 16 күнүгэр Тулагы диэки, Намныыр трасса 20 км баар  түһүлгэҕэ, Дьокуускай куорат бэтэрээннэрин түмсүүтүн ыһыаҕа буолан ааста. Быйылгы тэрээһини Варвара Иннокентьевна Дмитриева салайааччылаах Киин уокурук Бэтэрээннэрин сэбиэтэ иилээн-саҕалаан ыытта. Манна даҕатан эттэххэ, бу Сэбиэт бэтэрээннэрэ куорат салалтата тэрийэр ханнык да тэрээһиниттэн туора турбакка, барытыгар көхтөөхтүк кытталлар.

Ол курдук, быйылгы ыһыахха кинилэр эппиэтинэстээхтэрин иһин, бэлэмнэнии үлэтин олох эрдэттэн саҕалаабыттара. Хас субуота ахсын уһуйааччы Анастасия Сидорова салалтатынан АГИКИ устудьуоннарын кытта ыһыах үөрүүлээх аһыллыытын  эрэпэтииссийэлээбиттэрэ, 70-80 саастаах ытык дьоннор үҥкүүгэ, ырыаҕа, сиэри-туому толорорго үөрэммиттэрэ сөхтөрөр.

Анаммыт күн, төһө да сытыы тымныы тыаллааҕын иһин, кыанар-кыаммат бэтэрээннэр бука бары мустан, олус дуоһуйа, үөрэ-көтө ыһыахтаатылар. Быйылгы тэрээһин Дьокуускай куоракка иҥэриллибит Килбиэннээх үлэ куоратын аатыгар уонна Үлэ сылыгар ананна. Биллэн турар, ити үрдүк аат биир күнүнэн да, сылынан да ситиһиллибэт, бу мустубут бэтэрээннэр эдэр саастарыгар сүүрэн-көтөн, үлэлээн-хамсаан, көлөһүннэрин тоҕон үлэлээбиттэрин түмүгэ буолара саарбахтаммат.

Куорат Киин уокуругун сэбиэтин бэтэрээннэрэ ыһыах сиэрин-туомун толору тутуһан ыыттылар, алгыс тылын иҥэриннилэр, оһуокайы, араас күрэхтэри тэрийдилэр. Үөрүүлээх түгэни үллэстэ, эҕэрдэ тылы этэ, араас наҕараадалары туттара куорат бас-көс дьоно кыттыыны ылбыттара кырдьаҕастары үөртэ. Ол курдук, куорат Дууматын бэрэссэдээтэлин солбуйааччы Е.И. Евсикова, социальнай харалта управлениетын салайааччыта С.И. Матвеев, өрөспүүбүлүкэ бэтэрээннэрин сэбиэтин бэрэссэдээтэлэ В.О. Иванов, куорат бэтэрээннэрин сэбиэтин бэрэссэдээтэлэ Н.А. Тряпша истиҥ тылларын тиэртилэр.

Евдокия Евсикова тыл этэригэр: «Киин уокурук бэтэрээннэрин сэбиэтэ (бэрэс. Варвара Дмитриева) ханнык да урут ыытыллар тэрээһиннэрдээҕэр ураты бырагырааманы бэлэмнээбиттэр, онон үрдүк таһымнаах бырааһынньыгы тэрийбиккит», — диэн бэлиэтээтэ, улаханнык махтанна.

Дьэ, ити курдук ытык кырдьаҕастарбыт сааһырдыбыт диэн дьиэлэригэр бүгэн олорбокко, олох үөһүгэр сылдьаллара киһини үөрдэр. Мэлдьи да маннык чэгиэн-чэбдик, үөрэ-көтө сылдьыҥ, уһун үйэлэниҥ диэн алгыыбыт.

Түмүгэр кэлэр 2024 сыллааҕы ыһыаҕы ыытар көһө сылдьар чороону Табаҕа бэтэрээннэрин сэбиэтэ тутта.