20.10.2022 | 08:30

Дьокутаат кэриэһигэр өлгөм бириистээх турнир

Дьокутаат кэриэһигэр өлгөм бириистээх турнир
Ааптар: Баһылай ПОСЕЛЬСКАЙ
Бөлөххө киир

Ааспыт субуоталаах өрөбүлгэ “Триумф” спортивнай комплекска Ил Түмэн дьокутаата, “Столичнай” ырыынак дириэктэринэн таһаарыылаахтык үлэлии сылдьыбыт, бэйэтин кэмигэр ССРС оҕолоругар иккис миэстэ буолбут көҥүл тустууга ССРС спордун маастара, Өймөкөөнтөн төрүттээх-уустаах Александр Крылов кэриэһигэр Бүтүн Арассыыйатааҕы 1-кы турнир түмүктэннэ.

Маастар нуормалаах турнирга дойду 12 регионуттан 126 бөҕөс күөн көрүстэ. Турниры Александр Крылов үөлээннээхтэрэ, биир дойдулаахтара тэрийдилэр. Саха Өрөспүүбүлүкэтин Бырабыыталыстыбатын Баһылыгын солбуйааччы Дмитрий Садовников, спорт миниистирэ Леонид Спиридонов, “Столичнай” ырыынак салайааччыта, көҥүл тустууга норуоттар икки ардыларынааҕы кылаастаах спорт маастара Афанасий Заболоцкай, Николай Адушинов, Алексей Филиппов, Анатолий Андреев уо.д.а. биир кылааска үөрэммит, бииргэ эрчиллибит доҕотторо, Александр Крылов дьиэ кэргэнэ, ийэтэ Саргылаана Семеновна кыттыыны ыллылар. 

Турнир биир сүрүн тэрийээччитэ, 2000000 солк. үбүлээбит, Өймөкөөн улууһун баһылыга Иннокентий Семенович Сивцев Александр Крылов Өймөкөөн, Муома, Халыма, Томпо улуустарын дьокутаатын быһыытынан элбэх үлэни ыыппытын, дьоҥҥо-сэргэҕэ көмөлөспүтүн, пандемия туран, үс сыл буолан баран маастар нуормалаах Бүтүн Арассыыйа таһымнаах турнир аан бастаан ыытыллыытын ситиспиттэрин, уон ыйааһын кыайыылаахтарыгар – 70 000 солк., бириистээх миэстэлэргэ тиксибиттэргэ 50 000 солк., 30 000 солк. кээмэйдээх харчынан бириистэри олохтообуттарын, “Майтона” салайааччылара бырааттыы Ушницкайдар 1 000 000 уу харчынан көмөлөспүттэрин, турнир мантан ыла сыл ахсын ыытыллыахтааҕын, Александр Крыловынан киэн тутталларын эттэ.

Александр Крылову тустууга уһуйбут тренерэ, ийэтинэн аймаҕа, Саха Өрөспүүбүлүкэтин үтүөлээх тренерэ, өрөспүүбүлүкэ оҕолорун сүрүн тренерэ Прокопий Семенович Иванов бэйэтин иитиллээччитин туһунан кэпсииригэр Александры оҕо эрдэҕиттэн Шурик диэн таптаан ааттыылларын, уолаттарга таһаарыылаахтык тустубутун, Арассыыйа үөрэнээччилэрин Спартакиадатыгар 74 кг иккис миэстэлэммитин, “цепкайын”, туппутун ыыппатын, утарсааччыларын мостикка түһэрдэҕинэ, ыраастык хотуталыырын, “Столичнай” ырыынагы тэрийиэҕиттэн Дьокуускай куорат тустууга федерациятын солбуллубат вице-бэрэсидьиэнинэн үлэлээбитин, тустуук оҕолор соҕуруу күрэхтэһиилэргэ кэлэллэрин-баралларын үбүнэн-харчынан өйүүрүн, турнир Арассыыйа күрэхтэһиилэрин халандаарыгар киллэриллибитин, спонсордар көмөлөрүнэн ыытыллыбытын, тустууктар түмсүүлээхтэрин, хардарыта көмөлөсүһэллэрин бэлиэтээтэ.

Дмитрий Зайнидинов

Икки күннээх хапсыһыыларга 57 кг Алексей Копылов (Саха сирэ), 61 кг Алексей Чебодаев (Красноярскай), 65 кг Усман Шахгириев (Красноярскай), 70 кг Сайын Казырык (Тыва), 79 кг Дмитрий Зайнидинов (Красноярскай), 86 кг Азрет Улимбашев (Красноярскай), 92 кг Аюр Нимаев (Бурятия), 97 кг Максим Толмачев (Красноярскай-Саха сирэ), саамай ыарахан 125 кг ыйааһыннаахтарга Никита Хабаров (Саха сирэ) турнир кыайыылаахтара буоллулар.

Күүтүллүбүт хапсыһыы 74 кг ыйааһыннаахтарга буолла. Көбүөргэ Арассыыйа икки күүстээх бөҕөһө таҕыста. Бурятияттан аан дойду призера, Арассыыйа үс төгүллээх үрүҥ көмүс, боруонса призера, Иван Ярыгин икки төгүллээх призера, норуоттар икки ардыларынааҕы кылаастаах спорт маастара Евгений Жербаев уонна Европа чөмпүйүөнэ,  Арассыыйа икки төгүллээх чөмпүйүөнэ, Иван Ярыгин турнирын икки төгүллээх кыайыылааҕа, норуоттар икки ардыларынааҕы кылаастаах спорт маастара Чечня Өрөспүүбүлүкэтиттэн Исраил Касумов утарыта таҕыстылар. Күөн көрсүһүү реванш быһыытынан принципиальнай суолталаах. Хайаларыгар да эппиэтинэс улахан. Бу иннинэ Исраил Касумов наар кыайа-хото сылдьыбыта. Бэрт сытыы, тыҥааһыннаах киирсии 13:1 ахсаанынан Евгений Жербаев ыраас тэхиньиичэскэй кыайыытынан түмүктэннэ.

Евгений Жербаев

Бастаабыттар – 70 000 солк., иккис-үһүс миэстэлэргэ тиксибиттэр туһааннааҕынан 50 000 уонна 30 000 солк. биһирэннилэр. Кыайыылаахтар тренердэрэ 20 000 солк. бириэмийэлэннилэр. Болҕомтону сэрэбиэйи оонньотуу ылла. Кыһыл көмүс мэтээллээхтэр 1 000 000 солк. сүрүн бирииһи ылар туһугар сэрэбиэй тартылар. Онуоха 79 кг бастаабыт Красноярскай бөҕөһө Дмитрий Зайнидиновка дьоллоох, дьоро түгэн тосхойдо.

Турниры сүрүн үбүлээччилэринэн СӨ спортивнай тустууга федерацията (Ил Дархан Николаев А.С.), “Саханефтегазсбыт” (ген.дир. Лебедев В.Н.), Өймөкөөн улууһа (Сивцев И.С.), “Строительнай” ырыынак (ген. дир. Данилов И.И.), “Майтона” Айти-хампаанньа (бырааттыы Ушницкайдар), Нөмүгү килиэп оҥорор собуота (Нестеров В.А.) буоллулар. Барыта 4 мөл. солк. көмөлөстүлэр. Улахан өйөбүл!

Сонуннар

Ордук ааҕаллар

Дария Маркова:  «Сахам омуга кэтит кэскиллэниэ, уһун тускулланыа»
Дьон | 20.09.2023 | 18:00
Дария Маркова: «Сахам омуга кэтит кэскиллэниэ, уһун тускулланыа»
Туһунан, ураты өйдөөх-санаалаах, кэскиллээх, инникигэ эрэллээх, дойдум туһа диэн көмөҕө инники күөҥҥэ сылдьар ыччат, эдэр дьон баалларыттан киһи эрэ үөрэр, санаата көтөҕүллэр. Үгүс киһи билиҥҥи ыччаты мөҕөр-этэр да, тулабытын көрүннэххэ, дойдубутун тутан хаалыах, чөл толкуйдаах, булугас өйдөөх, күүстээх санаалаах оҕолорбут элбэхтэр эбээт. Мин биир оннук эдэр киһини, “Аламай” аһымал пуонда...
Грипп уонна ОРВИ ыарыыларын утары сэрэтэр миэрэлэри дьүүллэстилэр
Сонуннар | 15.09.2023 | 13:00
Грипп уонна ОРВИ ыарыыларын утары сэрэтэр миэрэлэри дьүүллэстилэр
Куорат баһылыгын социальнай боппуруостарга солбуйааччы Наталья Степанова Олохтоох дьаһалта санитарнай-эпидемиологическэй хамыыһыйатын мунньаҕын ыытта диэн Олохтоох дьаһалта пресс-сулууспата иһитиннэрдэ.
Йога олоҕу уларытар күүһэ
Дьон | 15.09.2023 | 12:00
Йога олоҕу уларытар күүһэ
Аныгы балысхан сайдыылаах үйэҕэ туох барыта көрүөх бэтэрээ өттүгэр уларыйар-тэлэрийэр. Тас эйгэ дьайыытыгар баһыйтаран, бириэмэ сырсыытыгар сылдьан, сорох киһи бэйэтин көрүммэт, онтон сылтаан ис туруга ыһыллар, ыарыыга түргэнник бэринэр.
Елизавета Далбараева:  «Артыыс — уопсастыба киһитэ»
Дьон | 16.09.2023 | 12:00
Елизавета Далбараева: «Артыыс — уопсастыба киһитэ»
Кинини интэриниэт ситимигэр дьээбэлээх-хооболоох тэттик вайннарга үгүстүк көрөр буолуохтааххыт. Куруук үөрэ-көтө сылдьар, дьоҥҥо аламаҕай сыһыаннаах, көрсүө-сэмэй майгылаах Елизавета Далбараева – Үүнэр көлүөнэ тыйаатырын биир саамай чаҕылхай уонна кэскиллээх артыыһа.