Дьиэ кэргэн сылын тэрийэр кэмитиэт мунньаҕа буолан ааста

От ыйын 29 күнүгэр Ил Дархан Айсен Николаев салайааччылаах Арассыыйаҕа буола турар Дьиэ кэргэн сылын Саха сиригэр тэрийэр кэмитиэт киэҥ ыҥырыылаах мунньаҕа буолан ааста.

Ил Дархан Айсен Николаев бэлиэтээбитинэн, Арассыыйаҕа биллэриллибит Дьиэ кэргэн сылын дьиэ кэргэн сыаннастарын бөҕөргөтүү, хас да көлүөнэ киһилээх улахан дьиэ кэргэҥҥэ ытыктабыллаах сыһыаны сөргүтүү, оҕо төрөөһүнүгэр усулуобуйаны тэрийии, элбэх оҕолоох ыаллары өйөөһүн курдук сүрүн соруктара Саха Өрөспүүбүлүкэтэ дьиэ кэргэн политикатыгар ыытар үлэтин кытта дьүөрэлэһэллэр.
Саха Өрөспүүбүлүкэтигэр Дьиэ кэргэн сылынан ыытыллыбыт тэрээһиннэр уонна былааннар туһунан сүрүн дакылааты Бырабыыталыстыба Бэрэссэдээтэлин солбуйааччы Георгий Степанов оҥордо.
Кини ааспыт Ийэ уонна Үлэ сылларыгар нэһилиэнньэ үп-харчы өттүнэн өйөбүллээх буоларыгар, оҕо төрөөһүнүгэр, дьиэ кэргэн сыаннастарын үрдэтиигэ туһуламмыт сыаллары олоххо киллэрии Дьиэ кэргэн сылыгар салҕанарын бэлиэтээтэ. Маны сэргэ федеральнай киин былааныгар сөп түбэһиннэрэн оҥоһуллубут 148 тэрээһини хабар 7 блоктан турар Саха Өрөспүүбүлүкэтин былааныттан сыл 7 ыйыгар 78 пуун туолбутун тоһоҕолоото. 
Санатар буоллахха, 2024 сылтан Чурапчы, Нам улуустарыгар уонна Дьокуускай куоракка Дьиэ кэргэн элбэх функциялаах кииннэрэ үлэлииллэр. Вице-премьер Георгий Степанов бэлиэтээбитинэн, маннык кииннэри салгыы Мииринэй, Томпо, Үөһээ Бүлүү оройуоннарыгар, атын да улуустарга арыйар былаан баар. 
Мунньах кыттыылаахтара сыл бүтүөр диэри ыытыллар тэрээһиннэри, саҥа киириэхтээх «Дьиэ кэргэн» национальнай бырайыагы, оҕо төрөөһүнүн элбэтии, аҕа көлүөнэни кытта үлэни күүһүрдүү, дьиэ кэргэн дохуотун үрдэтии боппуруостарын дьүүллэстилэр, диэн иһитиннэрэр үлэ уонна социальнай сайдыы министиэристибэтэ.