Детдомҥа бииргэ иитиллибиттэрин көрдүүр

Уус Алдан улууһун Лөгөй нэһилиэгин Хомустаах бөһүөлэгиттэн төрүттээх Виктор Иванович Новгородов билигин 82 саастаах. Кини аҕата Новгородов Иван Константинович 1942 сыллаахха сэриигэ ыҥырыллан барбыт. Аҕалара сэриигэ барбытын кэннэ 1,5 саастаах быраата ыалдьан өлөн хаалар. Икки оҕолоох ийэтэ Матрена Михайловна алта ыйдаах кыыһын Маайыһы эбэтигэр хааларар, онтон биэс сааһыгар сылдьар уолун, Бииктэри, Суоттуга сэрии тулаайахтарын түмэр дьааһыла диэн ааттанар дьиэҕэ биэрэр уонна Кэбээйиттэн балык таһыытын үлэтигэр ыытыллар.

Виктор Иванович оҕо дьиэтигэр икки сыл кыстаабыт. Оччолорго биэһин эрэ туолбут оҕо буолан, улахан тугу да өйдөөбөт. Аччык, мөлтөх таҥастаах оҕо тоҥон күнү быһа суорҕан анныгар сытарын өйдүүр.

Улуу Кыайыы 75 сылынан Виктор Иванович ааспыт олоҕун ыар кэрчигин уонна оччотооҕу биир эмэ оҕо баар буоллахтарына, эбэтэр ол дьон оҕолоро билсэллэригэр көрдөһөр, Кыайыы 75 үбүлүөйдээх сылыгар, курус да буоллар, ааспыты ахтыһыаҕыҥ, инникини ыралыаҕыҥ диэн ыҥырар. Билсэр төлөпүөҥҥүт: 8 967 -926 – 85 – 57.