22.02.2023 | 14:00

«Дархан Уус — 2023»

«Дархан Уус — 2023»
Ааптар: Розалия Томская
Бөлөххө киир

Дьокуускайга икки сыл тохтуу сылдьан баран “Дархан Уус” Саха сирин тимир уустарын быыстапката үрдүк таһымнаахтык буолан ааста. Тэрээһин урааҥхай аймахха уус аатын үрдүк үктэлгэ таһаарбыт киһибит, саха саарына, бөлүһүөк  Борис Неустоев-Мандар Уус үтүө аатын кытта ыкса ситимнээх. Быйылгы тэрээһини бастакы быыстапканы тэрийбит Серафим Валерьевич Попов кэриэһигэр анаатылар.

Быыстапкаҕа 62 уус бэйэтин үлэтин дьон дьүүлүгэр таһаарда. ХII-с төгүлүн ыытыллар уустар сүрүн түһүлгэлэригэр киин куоракка Сунтаартан, Ньурбаттан, Үөһээ Бүлүүттэн, Томпоттон, Тааттаттан, Уус Алдантан, Чурапчыттан, Мэҥэ Хаҥаластан, Намтан, Хаҥаластан уонна Дьокуускайтан кытыннылар. Номнуо ааттаах-суоллаах уопуттаах уустары сэргэ саҥа саҕалааччылар, бу идэҕэ уһуйулла сылдьааччылар тэҥҥэ үс хайысханан арахсан күрэхтэстилэр.

«Уус-уран оҥоhуулаах быhах»  номинацияҕа быһах тиэмэтэ, эриэккэһэ, төһө уустуктук оҥоһуллубута, туттуллубут матырыйаала учуоттанна.

 

«Булт быһаҕа» номинацияҕа ордук быһах угун хаачыстыбатыгар уонна туттарга табыгастааҕар болҕомто уурдулар. Оттон биитин тургутууга тириини, удьурҕайы, буойулаҕы, кыыл тааһын уҥуоҕун уонна кэнсиэрбэ бааҥкатын быһан, хайа охсон көрдүлэр.

«Ас быһаҕа» номинацияҕа киирбит быһахтары тургутууга “Тыгын Дархан” эрэстэрээн асчыттара – саха национальнай куухунатын аҕалаатар аҕата буолбут Иннокентий Тарбаахап үөрэнээччилэрэ кытыннылар.

Кыайыылаахтарга маһынан кыһыллан оҥоһуллубут статуэткалары уонна спонсордартан сыаналаах бириистэри туттардылар. Бу соторутааҕыта Таатта улууһун Баайаҕатыгар арыллыбыт Мандар Уус түмэлин пуондатыгар кыайыылаахтарга туттарыллыбыт статуэтканы туспа анал суруктаан бэлэхтээтилэр.

Быыстапка-дьаарбаҥка үөрүүлээх тэрээһиннэригэр Саха сирин уустарын сойууһун бэрэссэдээтэлэ Роман Готовцев-Мындыр Уус уонна «Дархан Уус» быыстапка тэрийээччитэ Никита Протодьяконов кытыннылар, Духуобунас академиятын академига  Борис Неустроев-Мандар Уус кыттааччыларга туһаайбыт этиитин видеонан көрдөрдүлэр.

“Дархан Уус” курдук үрдүк таһымнаах быыстапка сүрүн сыала-соруга өбүгэ үгэһин сөргүтүү, норуот төрүт үгэстэрин аныгы искусствоны кытта ситимнээһин буолар. Бу тэрээһиҥҥэ маастардар ыраахтан-чугастан түмсэллэр, алтыһаллар, уопут атастаһаллар. Сарыал Билюкин, Роман Готовцев-Мындыр Уус, Александр Данилов-Хаҥыл Уус, Василий Попов-Бааха Уус курдук ураты буочардаах уонна төрүт үгэһи аныгы үйэҕэ табыгастаахтык ханыылаан тарҕатар уустар үлэлэрин аҥаардас көрөн да элбэҕи билиэххэ-көрүөххэ сөп.

 

Күрэх кыайыылаахтара:

«Уус-уран оҥоһуулаах быһах»

1 миэстэ – Роман Петров (Нам), «Булчут. Утум» композициятынан;

2 миэстэ –  Илья Данилов (Таатта), «Хара тыа хаһаайына» үлэтинэн;

3 миэстэ – Василий Мухин (Таатта), «Дьыл кэмэ» композициятынан.

 «Булт быһаҕа»

1 миэстэ – Роман Аммосов (Хаҥалас);

2 миэстэ – Никифор Алексеев (Сунтаар);

3 миэстэ – Алексей Климовскай (Дьокуускай).

«Ас быһаҕа»

1 миэстэ – Илья Данилов (Таатта);

2 миэстэ – Степан Пахомов (Таатта);

3 миэстэ – Сергей Мандаров (Таатта).

 

Хаартыска: uluusmedia.ru

Сонуннар

Ордук ааҕаллар

Саха сирин саамай эдэр хапытаана - Дүпсүнтэн сыдьааннаах!
Дьон | 04.04.2024 | 09:00
Саха сирин саамай эдэр хапытаана - Дүпсүнтэн сыдьааннаах!
Өрүскэ, муораҕа, акыйааҥҥа да буоллун, араас идэ барыта баар, ол эрээри саамай биллэр уонна ааттаах-суоллаах – биллэн турар, хапытаан. Кинилэр хорсун сырыыларын, бэйэлэригэр эрэллээхтэрин, ыраах айаннарын туһунан төһөлөөх элбэхтэ аахпыппыт, киинэҕэ көрбүппүт буолуой.
Сири иилии эргийиэм!
Дьон | 12.04.2024 | 18:00
Сири иилии эргийиэм!
Кэбээйи Арыктааҕыттан төрүттээх Иннокентий Ноговицын бэлисипиэтинэн аан дойдуну биир гына айанныыр хоббилааҕын туһунан хас да сыллааҕыта суруйан турабыт. Иннокентий киһини кытта кэпсэтэригэр элбэх ууну-хаары эрдибэккэ, аҕыйах тылынан чуо ыйытыыга эрэ хоруйдуурун  билэр буоламмын, Кытайга тиийбититтэн саҕалаан, бассаабынан элбэх да элбэх ыйытыыларбынан көмөн туран, наадалаах информациябын хостоон ыллым. Кинини ыра санаатын...
Зоя Желобцова:  «Олох толору үөрүүтүн, кэрэтин билэн сылдьабын»
Дьон | 11.04.2024 | 10:00
Зоя Желобцова: «Олох толору үөрүүтүн, кэрэтин билэн сылдьабын»
«Үчүгэй киһи» диэн хайдах киһини ааттыылларый? Арааһа, бастатан туран, дьоҥҥо эйэҕэс, аламаҕай, үөрэ-көтө сылдьар, барыга-бары кыһамньылаах, үлэһит киһини ааттыыр буолуохтаахтар. Дьэ, оччотугар, биһиги дьүөгэбит Зоя Константиновна Желобцова онуоха сүүс бырыһыан эппиэттэһэр. Киһи киһитэ буоллаҕа биһиги Зоябыт!   Оттон киһи барахсан мутугунан быраҕар муҥур үйэтигэр дьонугар-сэргэтигэр, ыччаттарыгар хайдах суолу-ииһи, ааты, өйдөбүлү хаалларара...
«Доҕордоһуу» — оҕо саас ыллыга
Сонуннар | 11.04.2024 | 18:00
«Доҕордоһуу» — оҕо саас ыллыга
Бу күннэргэ өрөспүүбүлүкэҕэ бастакынан тэриллибит “Доҕордоһуу” оҕо үҥкүү норуодунай ансаамбыла 55-с сылын бэлиэтээтэ. Өрөспүүбүлүкэ үҥкүүтүн эйгэтигэр суолу тэлбит ансаамбыл үөрүүлээх тэрээһинин туһунан санаа атастаһыыларын ааҕыҥ.