Дьаһалта атын дьиэни куортамныырга уонна ипотеканы ыларга көмөлөһөргө бэлэм

Ааспыт нэдиэлэҕэ баһылык Евгений Григорьев хаһыс да төгүлүн Строительнай уокурукка көһө сылдьар мунньаҕы ыытта, олохтоохтору кытта көрсөн кэпсэттэ. Билиҥҥитэ саамай элбэх хаарбах дьиэлээх уокурук кыһалҕата бүтэрэ ыраах. Ол эрэн кинилэр холобурдарыгар куорат дьаһалтата баар кыһалҕаны быһаарарга тобулар саҥа суолларын арылхайдык көрүөххэ-истиэххэ сөп.

Бу сырыыга баһылык Жорницкай уул., 23, Пионерскай уул., 10 аадырыстар олохтоохторун кытта көрүстэ. Көрсүһүүгэ Строительнай уокурук управата, олоҕу-дьаһаҕы хааччыйар тутаах тэрилтэлэр салайааччылара, “Юнион” Салайар хампаанньа бэрэстэбиитэллэрэ кыттыыны ыллылар.

Муниципальнай тэрилтэлэр бэрэстэбиитэллэрэ нэһилиэнньэни кытта көрсөллөрө дьоҥҥо ордук тоҕоостоох – баар кыһалҕаны миэстэтигэр ыйан көрдөрөргө, быһаартара охсорго төһүү буолар кыахтаах. Бу дьиэлэр олохтоохторо, бастатан туран, Хомунаалынай өҥөнөн хааччыйар тэрилтэлэр магистральнай ситимнэри көрбөттөрүн-истибэттэрин, турбалар сылтан сыл олус куһаҕан туруктаахтарын, өрөмүөннэммэттэрин, кэмигэр уларытыллан испэттэрин үҥүстүлэр.

Строительнай уокурук салайааччыта Василий Пинигин кэпсээбитинэн, быйыл сааскы ириэрии саҕана бу дьиэлэр иккиэн ууга бара сылдьыбыттар, ОДьКХ министиэристибэтин көмөтүнэн, управа бэйэтин кыаҕынан ууну хачайдааһын ыытыллыбыт. Ону таһынан канализация ситимэ кээһэнэ сылдьыбыт. Куорат хаһаайыстыбатын үлэлэтэр сулууспа кээһэниини кэмигэр туораппыт. Ол кэннэ “Юнион” Салайар хаампаанньа канализация уута таһынан барбытын бэйэтин күүһүнэн оборторбут.

Хаарбах дьиэттэн көһөрүүгэ иэс-күүс атахтыан сөп

“Юнион” ХЭТ дириэктэрэ Юрий Радюков иһитиннэрбитинэн, бу дьиэлэр намыһах сиргэ тураллар, онон сыл аайы ууга барар буоллулар. Управа, “Жилкомсервис” көмөлөрүнэн, ону тэҥэ чааһынайдары наймылаһан сааскы ириэрии уутун утары обортороллор. Быйыл уопсайа 12 сайаапка киирбититтэн 7-тэ – ууну оборторууга, атыттара – ититии ситимин тэстиитигэр. Бэс ыйын бүтэһик күннэригэр дьиэлэргэ ититии ситимин ыраастааһын, батареялары сайҕааһын үлэтэ барыахтаах. Пионерскай уул., 10 нүөмэрдээх дьиэтигэр 16 кыбартыыра баарыттан 10 эрэ кыбартыыра хомунаалынай өҥө иһин кэмигэр төлөһөр эбит. Оттон Жорницкай уул., 23-гэр 4 эрэ кыбартыыра хомунаалынай өҥөтүн кэмигэр төлөөн олорор.

“Дьиэ-уот сыһыаннаһыыларыгар департамент” МХТ дириэктэрин солбуйааччы Вадим Семенов информациятынан, Жорницкай уул., 23, Пионерскай уул., 10 дьиэлэрэ 2019 сыл ахсынньытыгар хаарбах туруктаахтарынан билиниллибиттэр. Жорницкай уул., 23-гэр 16 кыбартыыраттан 5-һэ муниципальнай бас билиигэ турар, 11 – чааһынай, 7 хаһаайын мантан атын өссө дьиэлээх. Оттон Пионерскай уул., 10-гар 16 кыбартыыраттан 3 – муниципальнай, 13 – чааһынай бас билиигэ, 6 кыбартыыра хаһаайына мантан атын  эмиэ дьиэлээх.

Федеральнай таһымтан эбии үбүлээһиҥҥэ эрэнэбит

Баһылык Евгений Григорьев олохтоохторго быһаарбытынан, кинилэр дьиэлэрэ билигин үлэлии турар хаарбах дьиэттэн көһөрүү бырагырааматыгар хапсыбат, тоҕо диэтэххэ 2017 сыл тохсунньу 1 күнүн кэннэ хаарбаҕынан билиниллибиттэр. 2017 сыл тохсунньу 1 күнүн иннинэ хаарбах дьиэ реестригэр киирбит дьиэлэри көһөрүү бырагыраамата быйыл болдьоҕун иннинэ түмүктэниэхтээх.

Бу бырагыраама 2025 сылга диэри үлэлиир гына суоттаммыта, ол эрэн болдьоҕун иннинэ түмүктэнэр буолан, куорат салалтата 2024-2025 сылларга федеральнай былаастартан, 2017 сыл кэннэ хаарбах туруктааҕынан билиниллибит дьиэлэр олохтоохторун саҥа дьиэлэргэ көһөрө турар сыаллаах, эбии үбүлээһини туруорсар.

Территориялары сайыннарыы бырагыраамата үлэлиир

Ол эрэн 2-с, 4-с уонна 17-с кыбаарталлар дьиэлэрэ территориялары биир кэлимник сайыннарыы бырагырааматыгар хапсаллар. Дьону саҥа дьиэҕэ көһөрүүнэн «Өрөспүүбүлүкэтээҕи ипотека агентствота» (РИА) дьарыктаныаҕа.

Жорницкай уул., 23 уонна Пионерскай уул., 10 дьиэлэрэ тутааччы былаанынан оскуола тутуллуохтаах сиригэр тураллар. Ол иһин кинилэри социальнай эбийиэктэри тутууга өрөспүүбүлүкэ бүддьүөтүттэн анал хааһынаттан ылыллар кирэдьиит үбүн суотугар көһөрүөхтээхтэр. Кирэдьиит харчыта бэрилиннэ да, олохтоохтору көһөрөн саҕалыахтара. Хаһан саҕаланара билиҥҥитэ биллибэт, болдьохтор чуолкайдана иликтэр.

Көһөрүү иннинэ олохтоохтор иэстэрин-күүстэрин барытын сабыахтаахтар, онтон атын хамсаабат баайы-дуолу регистрациялааһын суутунан хааччахтаныан сөп.

Биллэн турар, баһылык бэлиэтээбитинэн, бастатан туран, мантан атын дьиэлэрэ суох, кыһалҕалаах олохтоохторго, араас чэпчэтиилэринэн туһанар бырааптаах дьоҥҥо, соҕотох олорор кырдьаҕастарга, инбэлииттэргэ  көмө оҥоһуллуохтаах.

Куортамнаан көһө туруохха сөп...

“Сытыы кыһалҕаны быһаарар биир суолунан куорат салалтата  манныгы көрөр: федеральнай бырагыраамаҕа хапсан саҥа дьиэҕэ көһүөхтэригэр диэри атын дьиэни куортамнаан олорор ороскуоттарын сабарга компенсация быһыытынан көмөлөһүөхпүтүн сөп. Ким атын дьиэтэ суох билигин олорорго кутталлаах буолбут хаарбах дьиэтиттэн атын сиргэ куортамнаан көһүөн сөп. Онуоха территориальнай уорганыгар сайаапка түһэрэр. Сайаапкалары хомуйан баран биһиги кэлэр сыл бүддьүөтүгэр үбүлээһини былаанныыбыт.

Маны таһынан куорат ипотека ылар кыахтаах дьоҥҥо көмөлөһүөн сөп (бырыһыанын субсидиялааһын быһыытынан), бу түгэҥҥэ дьон бас билэр дьиэтэ кинилэргэ син биир хаалар”,– диэн Евгений Григорьев кэпсээбитин олохтоохтор ордук сэҥээрдилэр.

***

Бу дьиэлэргэ буолбут мунньах иннинэ Евгений Григорьев Строительнай уокурук хаарбах дьиэлэрин актыбыыстарын кытта кэпсэтэн турар.

Сааскы ириэрии уутугар эмсэҕэлээбит, көһөрүллүүнү кэтэһэр дьиэлэр олохтоохторун кытта көрсүһүүлэр салҕанан бара туруохтара.