Дьөһөгөй Айыыга аналлаах күрэхтэр

Саха халандаарынан быйылгы Туймаада ыһыаҕа Дьөһөгөй Айыыга ананар. Онон Дьөһөгөй Айыыга аналлаах хас даҕаны күрэх былааннанар.
Бэс ыйын 24 күнүгэр күнүс 14.00 чаастан 9 №-дээх балаһааккаҕа -- И.С. Свинобоев (Тыыннаахап) аатынан ипподромҥа Олохтоох дьаһалта Култуураҕа уонна духуобунай сайдыыга управлениетын тэрийиитинэн «Күн Дьөһөгөй» ат симэҕин көрүү күрэҕэ күүтэр. Балаһыанньа быһыытынан күрэххэ маастары кытта улуус баһылыга кыттар. Ол эбэтэр хас биирдии улуус толору симэхтээх биир атынан киирэр  -- ыҥыыр, үүн, иҥэһэ, чаппараах о.д.а. барыта үгэс буолбут ирдэбилинэн оҥоһуллар. Кыттыан баҕалаахтары 89991745496 төлөпүөнүнэн күүтэллэр.
*
Эмиэ бу кэмҥэ, бэс ыйын 24 күнүгэр күнүс 14.00 чаастан, 12 №-дээх «Симэх түһүлгэтэ» балаһааккаҕа «Кыл алыптаах, сиэл ситимнээх» кылтан, сиэлтэн оҥоһуктарга өрөспүүбүлүкэтээҕи быыстапка-куонкурус буолар. Быыстапка-куонкурус Арассыыйаҕа буола турар Учуутал уонна уһуйааччы сылынан эдэр талааннары арыйар уонна маастардар уопуттарын тарҕатар сыалтан ыытыллар. Кыайыылаахтары «Сөрүө», «Панно», «Дэйбиир», «Сэлээппэ», «Симэх» номинацияларынан сыаналыахтара. Кыттыан баҕалаахтары Өксөкүлээх Өлөксөй аатынан Норуоттар доҕордоһууларын дьиэтигэр 302 каб. күүтэллэр.
*
Бэс ыйын 24 күнүгэр 20 №-дээх «Кымыс кырдала» түһүлгэҕэ 14.00 чаастан «Кымыс – Айыы аһа» VI-с бэстибээл-куонкуруһу үөрүүлээхтик арыйыы буолуоҕа. Тэрийээччи -- «Туймаада» АУо АО Агрохолдинг.
Күрэххэ кымыс оҥоруутунан дьарыктанар тэрилтэлэр, биирдиилээн урбаанньыттар, агрооскуолалар, кэтэх хаһаайыстыбалар бары кыттыахтарын сөп. 
Маныаха оҥорор бородууксуйаларын бэс ыйын 19 күнүгэр СӨ Аһылык технологиятын киинигэр аҕалан бэрэбиэркэлэтэллэр (Сэбиэскэй Аармыйа 50 сыла уул., 51/1, сарсыарда 09.00 чаастан киэһэ 18.00 чааска диэри. Бэс ыйын 24 күнүгэр кымыстарын күрэҕи тэрийээччилэргэ тиксэрэллэр. Кыайыылаахтары дипломнар уонна харчынан бириэмийэлэр күүтэллэр: бастакы миэстэ -- 150 тыһ. солк., иккис миэстэ -- 125 тыһ. солк., үһүс миэстэ – 100 тыһ. солк.
Интэриэһиргээбит дьону «Управление сельскохозяйственного производства и контроля» (Автодорожнай уул., 23, 113 кабинет) күүтэллэр.