15.11.2021 | 13:30

Чернышевскай уулуссатыгар хааччахтааһын киирэр

Чернышевскай уулуссатыгар хааччахтааһын киирэр
Ааптар: Айыына ДОНСКАЯ

Билиҥҥи кэмҥэ куорат нэһилиэнньэтэ күн-түүн элбии турарынан, тутуу күүскэ ыытыллар. Ону кытта уунан хааччыйар уонна ууну ыытар ситимнэри оҥоруу соруга турар.

Куорат ууну ыытар систиэмэтин 1-гы уонна 2-с №-дээх канализация коллектордара улахан ноҕуруускалаахтара бэлиэтэнэр. Ол иһин 3-с №-дээх коллектор тутуллара ирдэнэр. Ити эбийиэк тутулуннаҕына, ноҕурууска уонна Залог оройуонун, 6, 7, 8, 37, 55, 117, 118, 121, 122, 123 кыбаарталлар, Воинскай чаас, ДСК дьоҕус оройуонун олохтоохторун ууга кыһалҕалара суох оҥоһуллуохтаах. Сэтинньи 5 күнүттэн Дьокуускай куорат Чернышевскай уулуссатын сорох сирдэринэн саҥа коллекторы тутуунан сибээстээн хааччахтааһын киирдэ.

«Сэтинньи 5 күнүттэн Чернышевскай уулуссатыгар 1/7а тутууттан 86/2в нүөмэргэ диэри учаастакка 2022 сыл бэс ыйын 1 күнүгэр диэри хааччахтааһын киирэр», — диэн Уокуруктааҕы дьаһалта пресс-сулууспатын иһитиннэриитигэр этиллэр.

«Водоканал» АУо чахчытынан, маннык учаастактарга хааччахтааһын киирэр:

— Чернышевскай уул., 1/7а (шиномонтаж мастарыскыайа) Гастелло уул. диэри, сэтинньи 5 күнүттэн ахсынньы 31 күнүгэр диэри;

— Гастелло уул. быһа охсуһуутуттан «Азия» атыы-эргиэн киинигэр диэри 2022 сыл олунньу 15 күнүттэн 2022 сыл муус устар 22 күнүгэр диэри;

— «Азия» атыы-эргиэн кииниттэн эргийэ барар суолга диэри, 2022 сыл муус устар 30 күнүттэн 2022 сыл бэс ыйын 1 күнүгэр диэри.

Эбийиэктэргэ чугаһыыр суоллар көрүллүөхтэрэ. Аспааллааһын уонна суолу оҥоруу 2022 сыл балаҕан ыйыгар диэри түмүктэнэрэ былааннанар.

Оптуобустар оҥоһуллубут схемаларынан сылдьыахтара. Куорат кытыытыгар тиийэр 101, 103 уонна 108 №-дээх оптуобустар Автодорожнай уулуссанан ааһаллар.

3-с №-дээх канализация коллекторын тутуутун өрөспүүбүлүкэ бырабыыталыстыбата 2020 сыл ыам ыйыгар бигэргэппитэ. Бырайыак олоххо киирэригэр 3 млрд солк. тахса үп көрүллүбүт. Канализация коллекторын уһуна – 5,8 км. Билиҥҥи туругунан эбийиэк тутуута 203-с микрооройуонтан Чернышевскай уулуссатыгар, Күөх хонуу территориятыгар баар («Теплай» күөл аттыгар) 1220 м3/ч кыамталаах саҥа носуос станциятын дьиэтигэр диэри тиийбит.

Канализация коллектора үлэҕэ икки түһүмэҕинэн киириэхтээх.

Бастакы учаастак, 600 мм эргимтэлээх турба ситимэ: Чернышевскай уулуссатын 1/7а нүөмэриттэн саҕалаан (5 миэтэрэ дириҥнээх) Покровскайдыыр тракт бастакы эргиир суолугар диэри (круговой развязка) 3,9 миэтэрэ дириҥнээх оҥоһуллуохтаах. Үлэ 2021 сыл сэтинньи 5 күнүттэн 2022 сыл атырдьах ыйын 30 күнүгэр диэри ыытыллар.

Иккис учаастак, 500 мм эргимтэлээх турба ситимэ: Покровскайдыыр тракт бастакы эргиир суолуттан (Чернышевскай уул., 93) Автодорожнай уулуссатыгар диэри (2 миэтэрэ дириҥнээх) оҥоһуллуохтаах, үлэ 2022 сыл алтынньы 1 күнүттэн 2023 сыл бэс ыйын 1 күнүгэр диэри  былааннаммыт.

Автодорожнай уулуссатыттан Күөх хонуу территориятыгар баар носуос станциятыгар диэри уу көҥүл сүүрэ сытыахтаах, онон дириҥэ 2-тэн 5 миэтэрэҕэ диэри буолуохтаах.

Бастакы учаастак тутуута икки түһүмэххэ үллэһиллибит, ол курдук бастакы түһүмэххэ үлэ 2021 сыл сэтинньи 5 күнүттэн Чернышевскай уул., 1/7а Гастелло уулуссатыгар диэри 2022 сыл бүтүөр диэри ыытыллар.

Тутуу технологиятынан үлэ кыһыҥҥы өттүгэр, сир тоҥмутун кэнниттэн ыытыллар кыахтаах, оччоҕо турба ситимин уурарга бэлэмнэммит 5 миэтэрэ дириҥнээх траншеяларга  сир сиҥнэн түспэт. Итини таһынан, кыһыҥҥы өттүгэр суолга тырааныспар сырыыта аҕыйыыр.

Егор Кардашевскай, баһылыгы куорат хаһаайыстыбатын боппуруостарыгар солбуйааччы:

— Дьокуускай куоракка баччааҥҥа диэри ууну ыытар кииннэммит систиэмэни хапытаалынай уонна саҥардан тутуу, инженернэй коммуникациялары саҥардыы ыытыллыбакка турар.  Биллэн турар, ити үчүгэйгэ тириэрдибэт буоллаҕа. Ол иһин бастакы уонна иккис нүөмэрдээх коллектордар бэйэлэрин истэринэн ыытар кыахтара аччаабыт. Онон саҥа коллектор тутуутун саҕалаатыбыт. Биллэн турар, ити тутуу билигин кэккэ мэһэйдэри киллэриэҕэ, холобур, Чернышевскай уулуссатыгар хааччахтааһын киирдэ. Ол эрэн ити кылгас болдьоххо киирэр миэрэ диэн өйдүөх тустаахпыт. Үлэ түмүктэннэҕинэ, Залог, ДСК оройуоннарын уонна тутулла турар «Звезднай» дьоҕус оройуон, итини сэргэ киин куорат соҕуруу өттүгэр баар өссө уон кыбаартал олохтоохторо кииннэммит коллектор ситимигэр холбонор кыахтаныахтара. Дьокуускай сыл ахсын улаатар, кэҥиир, ол иһин куорат олохтоохторун ууну ыытыыга хаачыстыбалаах өҥөнөн хааччыйарбыт ирдэнэр. Өрөспүүбүлүкэ Ил Дархана Айсен Сергеевич Николаев уонна Саха сирин Бырабыыталыстыбатын өйөбүллэринэн, «Трехлетие благоустройства города Якутска» бырагыраама олоххо киириитин чэрчитинэн, бу күннэргэ улахан хабааннаах үлэ – коллекторнай канализация 3-с №-дээх салаатын тутуута саҕаланна. Түгэнинэн туһанан, куорат олохтоохторуттан баар уустуктары, кылгас болдьоххо киирэр хааччахтары өйдүүллэригэр ыҥырыам этэ. Өссө төгүл бэлиэтээн этэбин, ити барыта куорат олохтоохторун туһугар оҥоһуллар.

Сэтинньи 9 күнүгэр куорат баһылыгын солбуйааччы Антон Алексеенко предпринимателлэри кытта көрсөн коллектор тутуутунан сибээстээн Чернышевскай уулуссатыгар хааччахтааһын киирэрин туһунан дьүүллэстэ. Мунньахха «Водоканал» ПАУо, куораты тутуу уонна тырааныспар инфраструктуратын, ону сэргэ предпринимательство, потребительскэй ырыынак уонна туризм сайдыытын Департаменнарын үлэһиттэрэ, Уокуруктааҕы дьаһалта предпринимательствоны Координациялыыр сүбэтин көҕүлээччилэрэ кытыннылар. 

Биисинэс бэрэстэбиитэллэрэ Чернышевскай уулуссатыгар киирбит хааччахтааһын предпринимателлэр үлэлэрин харгыстыырын туһунан эттилэр.

«Улахан уйуктаах тиэхиньикэ кыараҕас уулуссаларынан кыайан ааспат. Ити ордук Крупская, Тимирязев уулуссаларыгар, Чернышескай уулуссатын 80 №-гэр баар кууһунан атыылыыр баазаҕа чугаһыыр суолларга сыһыаннаах», – диэн бэлиэтээтэ предпринимательствоны Координациялыыр сүбэ чилиэнэ Ольга Николаева.

«Водоканал» ПАУо кылаабынай инженерэ Андрей Аммосов Чернышевскай уулуссатыгар хааччахтааһын үс түһүмэҕинэн киирэрин санатта.

«Үлэ кэмигэр хайдах даҕаны хас биирдии предприниматель баҕа санаатын учуоттуур кыахпыт суох. Ол эрэн үөскээбит балаһыанньаттан тахсар курдук сорох мэһэйдэри туоратар миэрэлэри ылыахпыт. Канализация коллектора куорат сайдыытыгар ураты стратегическай суолталаах, ол иһин тырааныспар сырыытыгар быстах кэмнээх ыарахаттарга өйдөбүллээхтик сыһыаннаһаргытыгар ыҥырабыт», – диэтэ  Андрей Аммосов.

«Водоканал» ПАУо 3 №-дээх коллектор тутуутун кредитнэй сириэстибэлэр суоттарыгар ыытара этилиннэ. Итини таһынан, ити диэки оройуон олохтоохторо бары холбонор кыахтаналлар.

Куорат баһылыгын солбуйааччы Антон Алексеенко предпринимателлэргэ таһаҕастарын, матырыйаалларын эрдэттэн тиэйэри былаанныылларын курдук эттэ. Предпринимателлэр Чернышевскай уулуссатын кэҥэтэр туһунан ыйыталастылар. Онуоха Антон Алексеенко уулусса түөрт балаһаҕа диэри кэҥиирин бигэргэттэ уонна билигин ити хайысханан үлэ былааҥҥа баарын туһунан эттэ.

Мунньах түмүгүнэн хас биирдии предприниматель «Водоканал» ПАУо уонна Уокуруктааҕы дьаһалтаны кытта үлэлэһэргэ бэйэтин этиилэрин киллэрэрин туһунан быһаарыы ылылынна.

Үөһэ этиллибитин курдук, Дьокуускай куорат баһылыга Евгений Григорьев сорудаҕынан, саҥа канализация коллектора тутуллан бүттэҕинэ, Чернышевскай уулуссатын ити учаастага кэҥэтиллэрэ, түөрт балаһалаах суол буолара былааннанар. Ити олоххо киирдэҕинэ, киин куорат соҕуруу өттүн сүрүн суола элбэх ахсааннаах тырааныспар сылдьарыгар табыгастаах буолара күүтүллэр.

Сонуннар

Ордук ааҕаллар

Хоһоон ааҕыытыгар аһаҕас күрэс
Сонуннар | 24.11.2021 | 16:00
Хоһоон ааҕыытыгар аһаҕас күрэс
Саха АССР төрүттэммитэ 100 сылын кѳрсѳ, Ньурба оройуонун Малдьаҕар нэhилиэгин В.И. Максимов аатынан орто оскуолата 100 сылынан, Малдьаҕар  нэhилиэгин бастакы учуутала,  Дьокуускайдааҕы учительскай семинария бастакы выпускнига (1914-1917с.с)., Ньурба улууһун исполнительнай комитетын бэрэссэдээтэлэ, бэрэссэдээтэл солбуйааччыта (1924-1927 с.с)., Бүлүү уеһын общественнай куттала суох буолуутун комитетын чилиэнэ, продовольственнай уонна сир управаларын бэрэссэдээтэлэ (1923...
“Тобуруокап күһүнэ – Иэйии биһигэ"
Сонуннар | 22.11.2021 | 14:30
“Тобуруокап күһүнэ – Иэйии биһигэ"
“Иэйии” кэммиэрсийэтэ суох литературнай түмсүү көҕүлээһининэн “Тобуруокап күһүнэ – Иэйии биһигэ" кинигэ   Хаҥалас улууһун киин библиотекатыгар сүрэхтэннэ.    Тэрээһини Хаҥалас улууһун "Өлүөнэ долгуннара" литературнай түмсүү салайааччыта Людмила Колесова уонна Хаҥалас улууһун кииннэммит библиотекатын сүрүн испэсэлииһэ Валентина Колесова иилээн-саҕалаан ыыттылар.  Куйаар нөҥүө Үөһээ Бүлүүттэн «Нам» МТ нэһилиэгин баһылыга Николай Иннокентьевич Кардашевскай, Петр...
Уһааттаах дьордьомоһуттар
Тускар туһан | 21.11.2021 | 11:00
Уһааттаах дьордьомоһуттар
Ааҕааччыларбар тиэрдиэхпин баҕарар кэпсээним 1990-1991 сылларга буолбута. Оччолорго Сойуус баар, сопхуостар тигинэччи үлэлии тураллар, дьон-сэргэ этэҥҥэ олорор, астаах-таҥастаах кэмэ.  Кэргэним суоппар идэлээх, сопхуос “Урал” лесовоз массыынатыгар үлэлиир, мин бастакы уол оҕобор олоробун. Атырдьах ыйа этэ. Дьон өрөбүл аайы, үлэлэриттэн быыс-арыт булан, бары сир астыыллар. Билиҥҥи курдук тыаҕа тахсан ыалларгын, илин-арҕаа...
Эһэ ытыырын көрбүтүм...
Тускар туһан | 21.11.2021 | 12:00
Эһэ ытыырын көрбүтүм...
Бу түбэлтэ туһунан ааспыт үйэ 80-с сылларын саҥатыгар кырдьаҕас булчуттан истэн турардаахпын. Баһылай диэн ааттаах кырдьаҕас оччолорго 70-ун ааспыт этэ, мин 30-чалааҕым. Сэтинньи ыйга уоппуска ылан дэриэбинэттэн уонтан тахса көстөөх сиргэ атынан бултуу таҕыстыбыт. Үүтээммитигэр ортотугар хонон тиийдибит. Айаннаан иһэн булт суолун арааһын көрдүбүт. Тайах суола хас үрүйэ, үрэх аайы...