Быстах кэмнээх хомуур тула

Саха сиригэр дьоҕус мобилизация саҕаланыаҕыттан бойобуой дьайыыларга кытта сылдьар эр дьон бэйэлэрин санааларын, кимиэхэ туох тиийбэтин социальнай ситимнэргэ аһаҕастык иһитиннэрэр буоллулар. Онон бүгүн – хомуур тула кэпсэтиэх... Бастатан туран, тугу илдьэ барыллыахтааҕын туһунан. 

Сүрүн түгэннэри кэпсиэх иннинэ кылгастык ас чааһыгар тохтоон аастахха, кэнсиэрбэлээх ас наадата суох, маҥнай утаа туһанарга 1-2 күн аһыыр аскытын ылыҥ дииллэр, аныгы хаалаах сухой паек буолара ордук эбит.

Саамай наадалаах мал-сал:

Соттор, ис таҥас, спортивнай таҥас, халтарыйбат кроссовка, тапочка, утуйар мөһөөччүк, сис тоҥмотун хааччыйар анал байыаннай “Хоба”, илии-атах наколенниктара, берцовай атах таҥаһа, хаачыстыбалаах камуфляж (горка, натовка), хары чаһыта, аччаабыта икки симкалаах төлөпүөн (МТС буолара ордук), баан каартата (МИР) уонна уу харчы.

Анал байыаннай таҥаһы-сабы биэрэллэр. Ол эрээри тиийбит дьон камуфляжтара мөлтөҕүн бэлиэтииллэр, сиигинэн хайа барар, түргэнник алдьанар, умайар дииллэр. Онон «Горка” диэн ааттаах анал таҥаһы, сыаната да удамырынан, ордук хайҕыыллар. Малы-салы уктан илдьэ барарга альпинисткай үрүсээк сөп буолар эбит. Байыаннай чаас анал мөһөөччүгүнэн хааччыйар.

Эмп-томп булгуччулаах

Биллэн турар, балаһыанньа ааттыын байыаннай, туох барыта буолуон сөп. Онон эт-сиин эчэйиитин уҕарытар эмп-томп булгуччулаах. Бастатан туран, Арассыыйаҕа оҥоһуллан тахсыбыт тампоннары, гемостатигы хаһаанарга сүбэлииллэр. Ону таһынан скотч уонна ас суулуур салапаан наада буолуон сөбүн ыйаллар. Анал байыаннай эпэрээссийэ буола турар сиригэр балаһыанньа мүнүүтэ аайы уларыйа турара саарбаҕа суох.

Сибээс туһунан

Сибээс чааһа мөлтөҕүн кэпсииллэр. Ол курдук, “Билайн”, “Мегафон” үлэлээбэттэрин кэриэтэ эбит. Биллэн турар, атын регион симкатын атыылаһар булгуччулааҕын тоһоҕолууллар.