Быстах байыаннай хомуурга ыҥырыллыбыттар дьиэ кэргэттэригэр төлөбүр саҕаланна

«Бастакы 26 дьиэ кэргэн 200 тыһыынча солкуобай суумалаах төлөбүрү ылла. Ити төлөбүр байыаннай хомуурга ыҥырыллыбыттар эрэ буолбакка, байыаннай эпэрээссийэҕэ баҕа өттүнэн уонна хантыраагынан барбыт дьон дьиэ кэргэттэригэр эмиэ көрүллэр. Дьоруойдарбытын уонна кинилэр дьиэ кэргэттэрин өйүөхпүт!» - диэн Ил Дархан тоһоҕолоон бэлиэтээтэ.

Санатар буоллахха, алтынньы 5 күнүгэр байыаннай сулууспалаахтар  дьиэ кэргэттэрин өйүүр эбии миэрэлэринэн сайабылыанньаны хомуйуу саҕаламмыта. Сайаапканы е- yakutia.ru портал, судаарыстыбаннай өҥөлөр сайтарын эбэтэр «Мои документы» киин нөҥүө биэриэххэ сөп.

Быстах байыаннай хомуурга ыҥырыллыбыттар дьиэ кэргэттэрин чилиэннэригэр 200 тыһыынча солкуобай суумалаах биир төгүллээх төлөбүр, оҕо уһуйааныгар төлөбүрэ суох сылдьыы, оскуолалар 5–11 кылаастарын үөрэнээччилэригэр босхо аһылык, 6–18 саастаахтарга лааҕырдарга босхо путевка, орто уонна үрдүк үөрэх кыһаларыгар босхо целевой үөрэх, үрдүк стипендия, саллаат төрөппүттэригэр  босхо санаторнай-курортнай эмтэнии көрүллэр.