Борис Ельцин аатынан Бэрэсидьиэн библиотекатын баай пуондатын туһанар кыахтаннылар

Хаҥалас улууһун Чапаево сэлиэнньэтигэр Саха Өрөспүүбүлүкэтин маҥнайгы бэрэсидьиэнин архыып библиотекатыттан Борис Ельцин аатынан РФ бэрэсидьиэнин библиотекатыгар киириэххэ сөп буолла. Ельцин аатынан библиотекаҕа история, Арассыыйа судаарыстыбаннаһын, нуучча тылын баай докумуоннара сыыппараҕа көһөрүллэн хараллан сыталлар.

Библиотека сүрүн офиһа Санкт-Петербурга баар, ону таһынан Москубаҕа уонна Тюмень куоракка салаалара үлэлииллэр, оттон дойду үрдүнэн балтараа тыһыынча, 33 тас дойдуга 49 электроннай ааҕар саала баар.
Николаев кииҥҥэ электроннай ааҕар саала аһыллыытыгар Ельцин аатынан Бэрэсидьиэн библиотекатын регионнары кытта үлэҕэ департаменын дириэктэрэ, Тюмень уобалаһыгар үлэлиир библиотека салаатын дириэктэрэ Олег Шор кэлэн ыалдьыттаата.

“Саха сиригэр аан бастакытын ыраахтан олорон Ельцин аатынан библиотекаҕа киирии СӨ Национальнай библиотекатыгар уонна Ил Түмэҥҥэ аһыллыбыттара. Онон бу үһүс буолар. История докумуоннарын үөрэтэргэ улахан көмө буолуоҕа. Чапаево сэлиэнньэтигэр аһыллыбыта ордук үөрдэр, тоҕо диэтэххэ манна оҕо сайдарыгар, үөрэххэ күүскэ болҕомто ууруллар. Бүгүн Чапаево сэлиэнньэтэ – науканан дьарыктанар ыччат биһигэ. Манна Наука дьоҕус академията үлэлиир, бүтүн өрөспүүбүлүкэ оҕото, ыччата мустар, онон патриотическай иитиигэ эмиэ туһалаах буолуоҕа”,  — диир Саха Өрөспүүбүлүкэтин Национальнай библиотекатын дириэктэрэ Саргылана Максимова.
“Арассыыйа маҥнайгы национальнай электроннай библиотекатыгар киирэр кыахтанныгыт. Бүгүҥҥү күҥҥэ 90 мөлүйүөнтэн тахса сканнаммыт докумуон хараллан сытар. Үөрэх сайдыытыгар бу эмиэ, биллэн турар, төһүү күүс буолар. Оҕо, ыччат үчүгэй үөрэҕи ылынарын туһугар дойдубут биллэр үөрэх кыһаларын, академияларын кытта күүскэ үлэлэһэбит”, — диэн Олег Шор  эҕэрдэлээтэ.
“Оҕолорбут, кэнэҕэски ыччаппыт, ааҕааччыларбыт кэлэн, Бэрэсидьиэн библиотекатын докумуоннарыгар олоҕуран, билим эйгэтигэр саҥа арыйыылары оҥоруохтара диэн баҕа санаабын тиэрдэбин”, — диэтэ Саха Өрөспүүбүлүкэтин култуураҕа уонна духуобунай сайдыыга миниистири солбуйааччы Афанасий Ноев.

Ельцин аатынан Бэрэсидьиэн библиотеката 2009 сыл ыам ыйын 27 күнүгэр аһыллыбыта уонна Арассыыйа судаарыстыбаннаһын историятын, теориятын уонна практикатын докумуоннарын, нуучча тылын кинигэлэрин харайар, ону таһынан Арассыыйа национальнай библиотекатын аатын сүгэр уонна мультимедийнай киин быһыытынан үлэлиир. Манна Бэрэсидьиэн библиотекатын электроннай үлэтигэр тыһыынча кэриҥэ киһи уонна тэрилтэлэр кыттыһаллар.