“Бииргэ ТУК!” (тупсарабыт, уларытабыт, киэргэтэбит)

“Бииргэ ТУК!” (тупсарабыт, уларытабыт, киэргэтэбит)

Татьяна, Афанасий Охлопковтар дьиэлэрэ –  ил-эйэ эркиннээх, өйдөһүү-өйөһүү үктэллээх, үөрүү-көтүү үрүттээх, сылаас сыһыан салгыннаах, оҕо чугдаархай күлүүлээх дьиҥнээх дьол уйата.   

Сатабыллаах, туруу үлэһит ыал ийэтэ Татьяна @_kustuk_ көмүс ньээкэ уйаларын хайдах оҥостубуттарын, киэргэппиттэрин “Киин куорат” ааҕааччыларыгар кэпсиир. 

–Дьиэбитин бэйэбит аймахтарбыт көмөлөрүнэн туппуппут. Кэргэним Афанасий электрикатыгар, сантехникатыгар тиийэ бырааттарын кытта оҥорбута.

Ис өттүн фантазиям төһө тиийэринэн киэргэппитим. Хараҥа уонна дьэрэкээн өҥнөрү туһанартан туттумматахпыт, куттамматахпыт. 

Дьиэбит дьыл бары кэмнэрин – самаан сайыны, сандал сааһы, көмүс күһүнү, кырыа кыһыны көрдөрөр концепциялаах.  

Аан хоспут “күһүн” буолбута, онон кэргэним оҥорбут ыскаабын саһархай гына кырааскалаабыппыт. Өссө кыһыл өҥү эбиэҕим. Ити американскай бордюр оҥорбуппут. Фанера лиистэрин быһан.

Куукуна-гостинай – дьиэбит тэбэр сүрэҕэ, дьиэ кэргэн түмсэр хоһо сайыны көрдөрөр. От күөҕэ өҥ баһыйар.  Куукунабытын хатыҥ чараҥҥа майгыннатан, хара уонна маҥан гына оҥорбуппут. Оннооҕор тутаахтарын хатыҥҥа маарыннатан ылбыппыт.

Утуйар хос халлаан күөҕэ уонна араҕастыҥы сырдык өҥнөрдөөх. Манна кыһын кэрэ көстүүлэрэ харахха быраҕыллар. Сыттыктары тикпитим, оҕо оронугар плед эмиэ бэйэм баайбытым.

Оҕолор хосторугар сандал саас чаҕылыйар. Саһархай уонна сырдык сиэрэй өҥнөрдөөх. Хостору барытын холбуур өҥ — маҥан.

Кэнники кэмҥэ макраменан дьарыктанабын. Араас оҥоһуктарынан дьиэбитин киэргэттибит.

Охлопковтар дьиэлэрин элбэх тылынан ойуулуу сатаабаппыт. Ытык-мааны ыалга ыалдьыт үгүстүк сылдьар, хоноһо хонор, чугастар чуоҕуһаллар, ыраахтар ыксалаһаллар.

Саха сайдам ыалын иэримэ дьиэтигэр дьол-соргу тосхойдун, үөрүү-көтүү үксээтин диэн алгыс баһын сыалыыбыт.