Биэнсийэлээхтэргэ эбии төлөбүр

Биэнсийэҕэ регионтан бэриллэр социальнай төлөбүр туһунан СӨ Бырабыыталыстыбата 2009 сыл сэтинньи 23 күнүгэр таһаарбыт  «Об утверждении положения о порядке предоставления региональной социальной доплаты к пенсии в Республике Саха (Якутия)» диэн уурааҕар олоҕуран, олох таһымын алын кээмэйиттэн кыра дохуоттаах, үлэлээбэт биэнсийэлээхтэргэ эбии социальнай төлөбүр олохтонор.

2020 сылга биэнсийэҕэ эрэгийиэннээҕи социальнай төлөбүрү олохтуур сыалтан,  2019 сыллаахха балаҕан ыйын 11 күнүгэр тахсыбыт сокуоҥҥа олоҕуран, Саха Өрөспүүбүлүкэтигэр биэнсийэлээхтэргэ олох таһымын алын кээмэйэ  14 076 солк. бигэргэтиллибитэ. Бастакы  зонаҕа олорооччуларга — 17 011 солк., иккис зонаҕа — 13 720 солк. олохтоммут.

Бастакы зонаҕа (Абый, Аллайыаха, Анаабыр, Булуҥ, Үөһээ Халыма, Дьааҥы, Эдьигээн, Муома, Аллараа Халыма, Өймөкөөн, Өлөөн, Орто Халыма, Усуйаана, Эбээн Бытантай, Айхал бөһүөлэгэ уонна Удачнай куорат) – биэнсийэлээххэ Олох таһымын алын кээмэйэ 17 011 солкуобайга тэҥнэһэр.

Иккис зонаҕа (Алдан, Амма, Үөһээ Бүлүү, Бүлүү, Горнай, Кэбээйи, Ленскэй, Мэҥэ Хаҥалас, Мииринэй, Нам, Нерюнгри, Ньурба, Өлүөхүмэ, Сунтаар, Таатта, Томпо, Уус Алдан, Уус Майа, Хаҥалас, Чурапчы уонна Дьокуускай к.) – 13 720 солкуобай.

2019 сыл муус устар ыйыгар федеральнай сокуоҥҥа олоҕуран, үлэлээбэт биэнсийэлээхтэргэ регионтан бэриллэр социальнай  төлөбүрү ааҕыы бэрээдэгэр уларыйыылар киирбиттэрэ. РФ Биэнсийэ пуондатын  территориальнай уорганыттан биэнсийэ ылар үлэлээбэт биэнсийэлээхтэр эбии социальнай төлөбүрү оҥорторууга  олорор сирдэриттэн нэһилиэнньэ социальнай харысхалын уорганнарыттан чуолкайдаһыахтаахтар.

Биэнсийэҕэ эбии төлөбүр ый 1-кы чыыһылатыттан олохтонор.

Электроннай ньыманан сайабылыанньаны уонна туһааннаах докумуоннары gosuslugi.ru, e-yakutia.ru порталлар нөҥүө ыытыахха сөп.

Ирдэнэр докумуоннар:

• пааспар куоппуйата;
• биэнсийэлээх үлэлээбэтин туһунан бигэргэтэр докумуон куоппуйата.