27.09.2021 | 16:30

Бэрэбиэркэни ааспыт ырысыаптар

Бэрэбиэркэни ааспыт ырысыаптар
Ааптар: Наталья Кычкина
Бөлөххө киир

Үтүө күнүнэн, күндү ааҕааччыларым!
Көрсүбэтэх, кэпсэппэтэх ыраатта, уһун уоппуска кэнниттэн ахтылҕаннаах үлэбэр дьэ таҕыстым. Бүгүн куолубунан аҕыйах кэмҥэ муспут, бэйэм астаан көрбүт, бэрэбиэркэни ааспыт ырысыаптарбын эһиэхэ анаан бэчээттиирбин көҥүллээҥ.

Королевскайдыы салаат

Туох наадата:

200 грамм краб палочката;

4 сымыыт;

Кукуруза – бааҥка аҥаара;

Туус, майонез.

Астаргытын кубиктыы кырбаан баран туустаан, тумалаан майонезтыыгыт. Бэрт судургу, оҥорорго түргэн салаат.

Хаһаайкаларга сүбэ быһыытынан эттэххэ, краб палочкаларын маҕаһыынтан ылан тоҥорон хаһаанан кэбиһэргит ордук, хаһан баҕарар наада буоллаҕына ойутан таһааран салаат да оҥоруохха, ыһаарылыахха да сөп.

«Минутка» салаат

Туох наадата:

Тууһаммыт оҕурсу;

Сибиэһэй оҕурсу;

Теркаламмыт сибиэһэй моркуоп;

Ветчина;

Горох+кукуруза (үстүү остолобуой ньуоска);

Майонез.

Көрөргүт курдук, бу салаакка тугу да буһарар наадата суох. Онон уонча мүнүүтэнэн бэлэм буолар. Барытын кубиктыы кырбыыгыт, устуукатын төһө киһини аһатаргытыттан бэйэҕит көрөн кутуҥ. Уопсайынан, харах холуйан көрүүтэ диэн баар. Үгүс хаһаайка ону билэр уонна хараҕынан көрөн, амсайан бэйэтэ холоон үгүстүк астыыр буолуохтаах. Сорох ырысыапка эбэн-сабан, көҕүрэтэн, тупсаран да биэрдэххэ бааламмат.

Помидортан уонна лууктан сокууска

Туох наадата:

Помидор – 5 устуука;

Эриэппэ луук – 3 устуука;

Чеснок – 4 өлүүскэ.

Соуска: 1 ост. нь. мүөт+0,5 ч. нь. туус+кыһыл биэрэс ньуоска төбөтүгэр+0,5 ч.нь. базилик.

Араҥанан уурабыт: помидордар + луук + чеснок + соус.

Манна дьэ оруобуна бу ырысыап курдук оҥоро сатааҥ. Мин иккистээн оҥорорбор элбэх киһини аһатаары, ахсаанын аһара элбэтэммин бастакым курдук табыллыбатаҕа. Дьиҥинэн, олус үчүгэй, минньигэс сокууска.

Кабачоктан бэрэски

Туох наадата:

Кабачок – 1 устуука;

Бурдук – 3 ост. нь.;

Кефир – 3 ост. нь.;

Сымыыт – 1 устуука;

Туус, биэрэс, укуруоп, 1 өлүүскэ чеснок.

Кабачоктары чараас гына төгүрүктүү кырбаан баран туустуубут, 20 мүнүүтэ туруорабыт.

Дириҥ миискэҕэ аҕыйах ньуоска кефир кутабыт, 1 сымыыт, күөх тума, туус, биэрэс, чеснок эбэбит.

Бурдуктаан баран хойуу сүөгэй курдук буолуор диэри булкуйабыт.

Кабачокпутун ылабыт, уутун-хаарын тоҕобут. Бастаан бурдукка булкуйабыт, онтон тиэстэҕэ төкүнүтэбит.

Көмүстүҥү, араҥас өҥнөнүөр диэри арыыга икки өттүттэн ыһаарылыыбыт.

Оҕурсуттан сокууска

Туох наадата:

Сибиэһэй оҕурсу – 3 киилэ;

Мас арыыта – 250 мл;

Уу – 125 мл;

Саахар – 180 г;

Туус – 1,5 ост. нь.;

9 бырыһыаннаах уксуус – 100 мл;

Бэйэ сөбүлээн сиир кетчуба – 200-250 г.;

Чили кетчуп (мин “традиционнай” диэни туттубутум) – 200-250 г.;

Чеснок – 12 өлүүскэ, илдьиритэҕин.

Улахан тааска, миискэҕэ маринад оҥороҕун:

Уу + уксуус + саахар + мас арыыта + туус + икки араас кетчуп кутан баран булкуйаҕын. Бу кэннэ оҕурсуларгын тарбах саҕа гына эбэтэр бэйэ сөбүлүүрүнэн бысталыыгын.

Маринадтаах миискэҕэр оҕурсуларгын уураҕын, тэппитин кэннэ 20-25 мүнүүтэ оргутаҕын. Чеснок кутан баран эбии 10 мүнүүтэ тэптэрэҕин.

Бу сокуусканы мин быйыл үһүс төгүлүн оҥордум. 5-6 бааҥка тахсар. Үчүгэйэ, түргэнэ диэн бааҥкаларгын көннөрү итии, оргуйбут уунан сайҕаан ылаҕын, хаппахтарын эмиэ. Ол кэннэ оҕурсугун итиилии кутан баран умса ууран, нөҥүө күнүгэр тымныы сиргэ хаһаанаҕын. Дьиэлээхтэрим олус сөбүлээбиттэрэ, ыалдьыттарым буспут оҕурсу диэн дьиибэргииллэр, сиэн баран астыналлар.

Дьаабылыкаттан алаадьы

Туох наадата:

Бурдук – 1 ыстакаан;

Кефир – 250 мл;

Саахар – 2 ост.нь.;

Сымыыт – 2 устуука;

Дьаабылыка – 3 устуука;

Суода – 0,5 ч.нь.;

Туус;

Мас арыыта – 2 ост.нь.

Кефир + суода + туус = булкуйабыт.

Сымыыт уонна саахар эбэбит.

Бурдугу сиидэлээн кутабыт.

Дьаабылыканы сиэмэтиттэн ыраастаан, кубиктыы кырбаан баран кутан барытын булкуйабыт.

Мас арыытыгар ыһаарылыыбыт.

Мин бу алаадьыны, сахалыы алаадьыттан ураты буоллун диэн оҥорбутум. Биллэн турар, арыыны оборор, ол эрээри олус минньигэс, сымнаҕас буолбута, оҕолор да сөбүлээбиттэрэ.

Сүбүөкүлэ сэбирдэҕиттэн кэтилиэт

Туох наадата:

Сүбүөкүлэ сэбирдэҕэ – 15 устуука;

Луук – 2 устуука;

Чеснок – 1 өлүүскэ;

Сымыыт – 2 устуука;

Бурдук, туус, тума.

Сүбүөкүлэ сэбирдэхтэрин уонна луугу бытархай гына кырбыыгыт, чеснок эбэҕит (илдьиритэҕит).

Булкуйан баран бурдуктуугут. Туус, тума, сымыыт кутаҕыт.

Мас арыытыгар икки өттүттэн ыһаарылыыгыт.

Мин оруобуна маннык ырысыабынан оҥорбутум. Ол эрээри үүт кутар наада эбит диэн түмүккэ кэлбитим. Билигин ыал аайы сүбүөкүлэ үүннэ, дьон сэбирдэҕин быраҕан кэбиһэр, сүөһү да сиир. Онтон сатабыллаах хаһаайкалар кыһын кэтилиэккэ диэн анаан 15-тии устуука сэбирдэҕи кырбаан тоҥорон кэбиһэллэр эбит. Дьиҥэр, олус ураты, минньигэс кэтилиэт буолар, онон астаныҥ, дьиэлээхтэргитин күндүлээҥ.

Сонуннар

Ордук ааҕаллар

Дьикти түбэлтэ
Сынньалаңңа | 01.06.2024 | 17:00
Дьикти түбэлтэ
Уйбаан Уйбаанабыс сураҕа суох сүппүтүн туһунан сурах нэһилиэги биир гына тилийдэ. Сарсыарда олус хойуу сиик түспүт этэ. Ойоҕо халдьаайыттан көрөн турдаҕына, эр киһи алааһы бүтүннүү тарҕаммыт күдэрик тумаҥҥа ынахтарын көрдүү киирбитэ уонна ол кэнниттэн ууга тааһы бырахпыттыы мэлийбитэ... Дьахтар бу киһи туман түспүтүн туһанан арыгыһыт доҕотторун диэки сүүрбүт дии санаан,...
Умнуллубут аспытын сөргүтүөххэ
Тускар туһан | 01.06.2024 | 18:00
Умнуллубут аспытын сөргүтүөххэ
Оскуолалар, уһуйааннар ыһыахтара үгэннээн тураллар. Сотору улахан ыһыахтар кэлиэхтэрэ. Ону кытта сахалыы сандалыбытыгар тугу астыырбытын былаанныыбыт. Үгэс буолбут бүлүүдэлэртэн хал буолбут буоллаххытына, өбүгэлэрбит умнулла быһыытыйбыт астарын сөргүтэргэ ыҥырабыт.   Искэхтээх эбэтэр хааннаах алаадьыэ Алаадьы тиэстэтигэр ханнык баҕарар бөдөҥ балык искэҕин кутан буһардахха, ураты уонна тотоойу бүлүүдэ буоларын билэбит. Оттон сорох хотугу...
Былатыан Эверстов:  «Элбэх дьоҥҥо сонуну кэпсиир кыахтаах буолар — дьол»
Дьон | 06.06.2024 | 10:00
Былатыан Эверстов: «Элбэх дьоҥҥо сонуну кэпсиир кыахтаах буолар — дьол»
Хас сир аайы ураты дьон баар буолар. Кинилэр олохторун хара маҥнайгыттан атыннык олоро сатыыллар. Барыларыгар баар курдук нус-хас дьылҕаҕа дураһыйбаттар. Оннук дьикти киһинэн Дьааҥы улууһугар олорор эрээри, өрөспүүбүлүкэ, дойду, аан дойду үгүс бэлиэ спортивнай түгэннэрин көтүппэккэ хамнаһа суох сырдатар суруналыыс, киэҥ сырыылаах айанньыт, коллекционер, фотограф, спортсмен, норуот тапталын ылбыт Платон...