Байыаннай сулууспалаахтар дьиэ кэргэттэрэ гаастааһыҥҥа 150 тыһыынча солкуобайы ылыахтара

Гаас тэрилин атыылаһарга биир төгүллээх көмө, социальнай гаастааһын бырагырааматын чэрчитинэн, өрөспүүбүлүкэ бүддьүөтүттэн бэриллэр. Ил Дархан Айсен Николаев манна сыһыаннаах сорудаҕы регион бырабыыталыстыбатыгар биэрдэ. Өйөбүл дьиэ кэргэн дохуотуттан тутулуга суох.

«Быстах байыаннай хомуурга барбыт дьон кэргэттэрин, ийэлэрин кытта көрсүһүүгэ араас ыйытык киирбитэ, барытын быһаара сылдьабыт. Олортон биирдэстэрэ – дьиэлэрин гааска холбооһун. Биллэн турар, тута быһаарыыны эрэйэр тыын боппуруос. Биир дьиэ кэргэҥҥэ тута көмөлөспүппүт. Урут бэлиэтээн аһарбытым курдук, барыларын кыһалҕаларын быһаарыахха наада», - диэтэ Айсен Николаев.

Сыл саҥатыттан, Ил Дархан быһаарыытынан, социальнай гаастааһыҥҥа көмө кээмэйэ 100 тыһыынча солкуобайтан 150 тыһыынча солкуобайга диэри улааппыта.

Манна даҕатан эттэххэ, олорор дьиэлэри гаастааһыҥҥа материальнай көмө 2010 сылтан оҥоһуллар. Билиҥҥи туругунан аадырыстаах көмө кыаммат ыалларга, соҕотох олорор үлэлээбэт биэнсийэлээхтэргэ, Аҕа дойду Улуу сэриитин кыттыылаахтарыгар, тыыл бэтэрээннэригэр оҥоһуллар. 2010–2021 сылларга 813 мөлүйүөн солкуобайдаах аадырыстаах көмөнөн 9 тыһыынча кэриҥэ дьиэ кэргэн туһаммыт.