Байыаннай дьайыы кыттыылаахтарын уонна дьиэ кэргэттэрин өйөөһүн салҕанар

Өрөспүүбүлүкэ Ил Дархана Айсен Николаев, алтынньы 23 күнүгэр, 80-с №-дээх «Анал байыаннай эпэрээссийэ кэмигэр байыаннай дьайыы кыттыылаахтарын уонна дьиэ кэргэттэрин өйүүр миэрэлэр тустарынан» ыйаахха илии баттаабыта.

Докумуоҥҥа олоҕуран өйөбүл маннык миэрэлэрэ бааллар:

— олох-дьаһах өҥөтүн уонна хапытаалынай өрөмүөн төлөбүрүттэн 50%-наах компенсация (2024 сыл тохсунньу ыйыттан);

— олорор дьиэттэн чугас турар оҕо уһуйааныгар уонна оскуолаҕа көһөрүүгэ бастакы уочарат;

— оскуола иннинээҕи үөрэҕирии тэрилтэлэрин төгүрүк суукканан үлэлиир бөлөхтөрүгэр бастакы уочаратынан киллэрии;

— оскуолалар уһатыллыбыт күннээх бөлөхтөрүгэр (продленка), итиэннэ куруһуоктарга, секцияларга уочарата уонна төлөбүрэ суох киирии;

— спортивнай секцияларга киирбит оҕолору босхо спортивнай пуорманан хааччыйыы (2024 сыл тохсунньу ыйыттан);

— 6,6-18 саастаах оҕолору Саха сирин чэбдигирдэр уонна сынньалаҥ лааҕырдарыгар путевкаларынан хааччыйыы;

— култуура тэрилтэлэригэр чэпчэтиилээх көрүҥүнэн сырытыннарыы.

Быйыл сэтинньи ыйга өрөспүүбүлүкэ салалтата  байыаннай дьайыы кыттыылаахтарын уонна дьиэ кэргэттэрин өйөөһүн саҥа миэрэлэрин бигэргэтиэҕэ.

Итини таһынан, бырабыыталыстыба бэрэссэдээтэлин солбуйааччы Георгий Степанов байыаннай сулууспалаахтарга уонна кинилэр дьиэ кэргэттэригэр социальнай пааспардары оҥорорго сорудахтаата.