Байыаннай дьайыы кыттыылааҕар саҥа дьиэни тутуохтара

«Байыаннай сулууспалаах дьиэ кэргэнигэр саҥа дьиэ тутуута ирдэнэр. Билигин байыас кэргэнигэр уонна оҕолоругар сылаас таҥаһы, гуманитарнай көмөнү хомуйуохха наада. Өрөспүүбүлүкэ бырабыыталыстыбатын өттүттэн көмө оҥоһуллуоҕа, ол туһунан сорудаҕы бырабыыталыстыба бэрэссэдээтэлигэр биэрдим», – диэтэ регион баһылыга.

Санатар буоллахха, олунньу 12 күнүгэр, куорат уокуругун Марха дьоҕус оройуонугар байыаннай сулууспалаах Валерий Моякунов дьиэ кэргэнин олорор дьиэтэ, докумуоннара, гарааһа, массыыната уокка былдьанна. Кэргэнэ уонна икки оҕото нэһиилэ быыһаннылар.

Руслан Платонов Ил Дархан сорудаҕынан байыаннай сулууспалаах дьиэ кэргэнин кытта көрсөн туох суһал көмө ирдэнэрин чуолкайдаста.

«Байыаннай сулууспалаах дьиэ кэргэнигэр ирдэнэр көмөнү барытын оҥоруохпут. «Биир Ньыгыл Арассыыйа» туттар тэриллэринэн хааччыйыаҕа, докумуоннары чөлүгэр түһэрэргэ юридическэй көмөнү оҥоруоҕа уонна саҥа дьиэни тутан биэриэҕэ. Ити өттүгэр уопут баар. Тутууну партия активистара, дьокутааттара, «Үтүө санаа спецнаһа» уонна «Биир Ньыгыл Арассыыйа Эдэр гвардията» уопсастыбаннай тэрилтэлэр байыастара ыытыахтара. Үлэ халлаан сылыйда да саҕаланыаҕа. Күһүөрү ыал саҥа дьиэҕэ киириэҕэ. Ити биһиги иэспит. Аҕа дойдуну көмүскүүр байыаннай сулууспалаахтар дьиэ кэргэттэригэр «Биир Ньыгыл Арассыыйа» болҕомтотун мэлдьи ууруоҕа уонна кыһаллыаҕа», – диэтэ Руслан Платонов.